મધુબની: બિહારના મધુબની જિલ્લાના પિપરાઓન ગામમાં રવિવારે રાત્રે એક ભયાનક અકસ્માતે લગ્નના હર્ષોલ્લાસને કરુણ આક્રંદમાં ફેરવી દીધો છે. પોતાના પરમ મિત્રના લગ્નની ઉજવણીમાં સામેલ થવા આવેલા બે આશાસ્પદ યુવાનો માટે કાળ જાણે રસ્તા પર જ બેઠો હતો. NH 227 પર પિપરાઓન બજારમાં જ્યારે લગ્નની 'માટકોર' વિધિ ચાલી રહી હતી, ત્યારે જ સહરઘાટ તરફથી આવતી એક પૂરઝડપે દોડતી અલ્ટો કારે રસ્તાની સાઈડમાં ઉભેલા બે મિત્રોને જોરદાર ટક્કર મારી કચડી નાખ્યા હતા.
ઘટનાસ્થળે જ મિત્રએ તોડ્યો દમ
આ અકસ્માત એટલો ભયાનક હતો કે પિપરાઓન ગામના રહેવાસી પ્રવીણ કુમાર સાહનું ઘટનાસ્થળે જ કરુણ મોત નીપજ્યું હતું. જ્યારે તેની સાથે રહેલો સેમહાલી ગામનો યુવાન ગોપાલ કુમાર ગંભીર રીતે ઘાયલ થયો છે. લોહીલુહાણ હાલતમાં બંનેને તાત્કાલિક ઉમગાંવ હોસ્પિટલ ખસેડવામાં આવ્યા હતા, જ્યાં ડોક્ટરોએ પ્રવીણને મૃત જાહેર કર્યો હતો. ગોપાલની હાલત અત્યંત નાજુક હોવાથી તેને પ્રાથમિક સારવાર બાદ હાયર સેન્ટર રિફર કરવામાં આવ્યો છે.
મહિલાઓએ હિંમત બતાવી પણ ડ્રાઈવર નાસી છૂટ્યો
અકસ્માત સર્જીને કાર ચાલકે ભાગવાનો પ્રયાસ કર્યો હતો, પરંતુ ત્યાં હાજર હિંમતવાન મહિલાઓએ કારને ચારે બાજુથી ઘેરી લીધી હતી. ભીડનો રોષ જોઈને ડ્રાઈવર ડરી ગયો હતો અને પોતાની કાર ઘટનાસ્થળે જ મૂકી અંધારાનો લાભ લઈને નાસી છૂટ્યો હતો. હરલાખી પોલીસ સ્ટેશનના ઇન્સ્પેક્ટર રણજીત કુમારે જણાવ્યું હતું કે, પોલીસે અકસ્માત સર્જનાર અલ્ટો કાર જપ્ત કરી લીધી છે અને નંબર પ્લેટના આધારે તેના માલિકની શોધખોળ શરૂ કરી છે.
શોકમાં ગરકાવ થયું ગામ, વરરાજાને લાગ્યો આઘાત
જે મિત્રના લગ્નમાં ડાન્સ અને ગીતોના સૂર રેલાતા હતા, ત્યાં હવે માત્ર રૂદન સંભળાઈ રહ્યું છે. વરરાજાને જ્યારે પોતાના જ જીગરજાન મિત્રના મોતના સમાચાર મળ્યા ત્યારે તે સ્તબ્ધ થઈ ગયો હતો. મૃતક પ્રવીણના પરિવારજનોએ આક્રંદ સાથે સરકાર પાસે યોગ્ય વળતર અને ઘાયલ ગોપાલની સારવાર માટે મદદની માંગ કરી છે. પોલીસે મૃતદેહને પોસ્ટમોર્ટમ માટે મોકલી કાયદેસરની કાર્યવાહી હાથ ધરી છે.