પશ્ચિમ એશિયામાં વધતા તણાવ વચ્ચે ઇઝરાયલ અને અમેરિકાના હુમલાઓ બાદ ઊભી થયેલી યુદ્ધ જેવી સ્થિતિની સીધી અસર હવે ભારતમાં જોવા મળી રહી છે.ઈરાન દ્વારા મહત્વપૂર્ણ દરિયાઈ માર્ગ હોર્મુઝ સ્ટ્રેટમાંથી સપ્લાય ખોરવાઈ જતા દેશમાં LPG ગેસની અછત સર્જાઈ છે. આ ગંભીર પરિસ્થિતિને ધ્યાનમાં રાખીને વડાપ્રધાન મોદીએ તાત્કાલિક ઉચ્ચ સ્તરીય બેઠક બોલાવી છે અને ઘરેલુ ગ્રાહકો માટે ગેસનો પુરવઠો જાળવી રાખવા કડક સૂચનાઓ આપી છે. 

અહેવાલો મુજબ વડાપ્રધાન મોદીની અધ્યક્ષતામાં યોજાયેલી આ બેઠકમાં વિદેશ મંત્રી એસ. જયશંકર અને પેટ્રોલિયમ મંત્રી હરદીપ સિંહ પુરી હાજર રહ્યા હતા. બેઠક દરમિયાન હોર્મુઝ સ્ટ્રેટમાં સર્જાયેલી પરિસ્થિતિને કારણે ખોરવાયેલી સપ્લાય ચેઈનના વિકલ્પો અંગે ચર્ચા કરવામાં આવી. દેશના સામાન્ય નાગરિકોને LPG ગેસના પુરવઠામાં કોઈ વિક્ષેપ ન પડે તે અંગે ખાસ ધ્યાન કેન્દ્રિત કરવામાં આવ્યું.

હાલમાં કેન્દ્ર સરકારનું મુખ્ય ધ્યાન ઘરેલુ ગ્રાહકો માટે ગેસ સિલિન્ડરની ઉપલબ્ધતા જાળવી રાખવા પર છે. તેના કારણે ઔદ્યોગિક એકમો અને કોમર્શિયલ ક્ષેત્રને આપવામાં આવતો પુરવઠો ઘટાડવામાં આવ્યો છે. કોમર્શિયલ સિલિન્ડરોની સંખ્યા ઓછી કરવામાં આવતા હોટેલ અને રેસ્ટોરાં ઉદ્યોગે આ નિર્ણયનો વિરોધ નોંધાવ્યો છે, કારણ કે તેમના મોટા ભાગના વ્યવસાયિક કાર્યો LPG પર આધારિત છે. ઉદ્યોગ સંસ્થાઓએ ચેતવણી આપી છે કે જો સ્થિતિ લાંબા સમય સુધી આવી જ રહેશે તો અનેક હોટલો બંધ થવાની શક્યતા છે.

આ વૈશ્વિક કટોકટી India માટે ખાસ ચિંતાનો વિષય બની છે કારણ કે દેશ તેની કુલ LPG જરૂરિયાતનો લગભગ 62% ભાગ આયાત કરે છે. તે ઉપરાંત ક્રૂડ ઓઈલ માટે પણ ભારત લગભગ 85% સુધી વિદેશી સપ્લાય પર નિર્ભર છે. આ પુરવઠાનો મોટો હિસ્સો હોર્મુઝ સ્ટ્રેટ મારફતે આવે છે. જો આ માર્ગ લાંબા સમય સુધી પ્રભાવિત રહેશે તો ભારત માટે ઊર્જા સંકટ વધુ ગંભીર બની શકે છે.

છેલ્લા બે દાયકામાં દેશની મોટાભાગની વસ્તી રસોઈ માટે LPG પર સંપૂર્ણપણે નિર્ભર બની ગઈ છે. આવી સ્થિતિમાં ગેસની અછત સામાન્ય જનજીવનને ગંભીર રીતે અસર કરી શકે છે. આ પરિસ્થિતિમાં કેન્દ્ર સરકાર વૈકલ્પિક સપ્લાય ચેઈન શોધવા માટે યુદ્ધના ધોરણે કામ કરી રહી છે. આગામી કેટલાક દિવસો India માટે LPG પુરવઠા અને ઊર્જા સુરક્ષા બાબતે ખૂબ મહત્વપૂર્ણ માનવામાં આવી રહ્યા છે.