પશ્ચિમ એશિયામાં તણાવ દિવસેને દિવસે વધી રહ્યો છે. અમેરિકા અને ઈઝરાયલ તરફથી ઈરાન પર થતા સતત હુમલા અને ઈરાનની વળતી કાર્યવાહીથી સંઘર્ષ વધુ ગંભીર બન્યો છે. છેલ્લા લગભગ અગિયાર દિવસથી વિસ્તારમાં પરિસ્થિતિ તણાવપૂર્ણ છે અને ઈરાન તરફથી ખાડી વિસ્તારમાં આવેલા અમેરિકન ઠેકાણાઓ પર મિસાઈલ હુમલાની ઘટનાઓ સામે આવી રહી છે. આ દરમિયાન શાંતિ સ્થાપવા માટે રાજદ્વારી ચર્ચાના પ્રયત્નો થયા હતા, પરંતુ ઈરાનના વિદેશ મંત્રી સૈયદ અબ્બાસ અરાઘચીએ અમેરિકા સાથે ફરી મંત્રણાની શક્યતા નકારી કાઢી છે. 

ઈરાનના વિદેશ મંત્રી સૈયદ અબ્બાસ અરાઘચીએ એક ઈન્ટરવ્યૂમાં જણાવ્યું હતું કે અમેરિકા સાથે અગાઉ થયેલી વાતચીત પછી વિશ્વાસ તૂટી ગયો છે. તેમના જણાવ્યા મુજબ ગયા વર્ષે જૂનમાં ઈરાન અને યુનાઇટેડ સ્ટેટ વચ્ચે પરમાણુ મુદ્દે ચર્ચા ચાલી રહી હતી, પરંતુ વાતચીત ચાલુ હોવા છતાં ઈરાન પર હુમલો કરવામાં આવ્યો હતો. આ કારણે હવે અમેરિકાની સાથે નવી વાતચીત શરૂ કરવાની સંભાવના ખૂબ ઓછી છે.

અરાઘચીએ વધુમાં જણાવ્યું કે આ વર્ષે પણ અમેરિકા તરફથી આશ્વાસન આપવામાં આવ્યું હતું કે કોઈ હુમલો નહીં થાય અને પરમાણુ મુદ્દાનો શાંતિપૂર્ણ ઉકેલ શોધવામાં આવશે. છતાં પણ હુમલાઓ ચાલુ રહેતા હવે ઈરાન માટે અમેરિકા સાથે સંવાદ શરૂ કરવો પ્રાથમિકતા નથી. તેમણે જણાવ્યું કે ઈરાનમાં નવા સુપ્રીમ લીડર તરીકે Mojtaba Khameneiની પસંદગી દેશની સ્થિરતાનું સંકેત છે અને તેમની નીતિઓ સમય જતાં સ્પષ્ટ થશે.

વિશ્વમાં વધતા ક્રૂડ ઓઈલના ભાવ અંગે બોલતા સૈયદ અબ્બાસ અરાઘચીએ કહ્યું કે વૈશ્વિક પુરવઠામાં અવરોધ માટે ઈરાન જવાબદાર નથી. તેમના જણાવ્યા મુજબ United States અને Israelના હુમલાઓને કારણે તેલ ઉત્પાદન અને પરિવહન વ્યવસ્થામાં મુશ્કેલીઓ ઉભી થઈ છે. ખાસ કરીને Strait of Hormuz વિસ્તારમાં જહાજો માટે સુરક્ષા અંગે ચિંતા વધતા વૈશ્વિક સપ્લાય પર અસર પડી રહી છે.