મુંબઈ : આર્થિક રાજધાની મુંબઈના ઐતિહાસિક લોકભવનમાં આજે મહારાષ્ટ્રના નવા રાજ્યપાલ તરીકે જિષ્ણુ દેવ વર્માએ વિધિવત રીતે પદભાર ગ્રહણ કર્યો છે. એક ભવ્ય સમારોહમાં તેમણે રાજ્યના રાજ્યપાલ તરીકે શપથ લીધા હતા. આ પ્રસંગે મહારાષ્ટ્રના મુખ્યમંત્રી દેવેન્દ્ર ફડણવીસ, નાયબ મુખ્યમંત્રી એકનાથ શિંદે અને સુનેત્રા પવાર સહિત અનેક દિગ્ગજ નેતાઓ અને વહીવટી અધિકારીઓ હાજર રહ્યા હતા. રાષ્ટ્રપતિ દ્રૌપદી મુર્મુએ દેશભરમાં કરેલા રાજ્યપાલોના મોટા ફેરબદલ અંતર્ગત વર્માની પસંદગી મહારાષ્ટ્ર જેવા મહત્વના રાજ્ય માટે કરવામાં આવી છે.
ભવ્ય સ્વાગત અને શિષ્ટાચાર
નવા રાજ્યપાલ જિષ્ણુ દેવ વર્મા ગઈકાલે જ તેમના પત્ની સુધા દેવ વર્મા સાથે મુંબઈ પહોંચ્યા હતા. એરપોર્ટ પર તેમનું સ્વાગત કરવા માટે મુખ્યમંત્રી અને નાયબ મુખ્યમંત્રી સહિત મુંબઈના મેયર રીતુ તાવડે અને પોલીસ કમિશનર દેવેન ભારતી હાજર રહ્યા હતા. પરંપરાગત રીતે ગાર્ડ ઓફ ઓનર આપીને તેમને આવકારવામાં આવ્યા હતા.
કોણ છે જિષ્ણુ દેવ વર્મા?
જિષ્ણુ દેવ વર્મા ઉત્તર-પૂર્વ ભારતના કદાવર નેતા છે. તેઓ ત્રિપુરાના રાજવી પરિવાર સાથે સંબંધ ધરાવે છે અને ભારતીય જનતા પાર્ટીના અત્યંત વરિષ્ઠ નેતાઓમાંના એક ગણાય છે. તેમનો જન્મ 15 ઓગસ્ટ, 1957ના રોજ અગરતલામાં થયો હતો. તેમની પાસે વહીવટી કાર્યદક્ષતાનો બહોળો અનુભવ છે. તેઓ ત્રિપુરા સરકારમાં નાયબ મુખ્યમંત્રી તરીકે સેવા આપી ચૂક્યા છે અને નાણાં, ગ્રામીણ વિકાસ અને વીજળી જેવા મહત્વના વિભાગો પણ સંભાળ્યા છે.
રાજકીય સફર અને અનુભવ
વર્ષ 1993માં ભાજપમાં જોડાયેલા વર્માએ ત્રિપુરામાં પક્ષને મજબૂત કરવામાં પાયાની ભૂમિકા ભજવી છે. તેઓ ઇન્ડિયન નેશનલ ટ્રસ્ટ ફોર આર્ટ એન્ડ કલ્ચરલ હેરિટેજ (INTACH) સાથે પણ જોડાયેલા રહ્યા છે, જે તેમની કલા અને સંસ્કૃતિ પ્રત્યેની રુચિ દર્શાવે છે. હવે મહારાષ્ટ્રના રાજ્યપાલ તરીકે તેમની નિમણૂક રાજ્યના રાજકારણ અને વહીવટમાં એક નવો દ્રષ્ટિકોણ લાવશે તેવી અપેક્ષા રાખવામાં આવે છે.