કાઈરો : પ્રવાસ દરમિયાન નવા સાહસો ખેડવા એ દરેક પ્રવાસીનું સપનું હોય છે, પરંતુ ક્યારેક આ સપનું દુઃસ્વપ્નમાં ફેરવાઈ જાય છે. ઇજિપ્તની મુલાકાતે ગયેલી એક મહિલા પ્રવાસી રાશા મેડિએન સાથે પણ કંઈક આવું જ બન્યું. સ્કુબા ડાઇવિંગ શીખવા દરમિયાન તેના પ્રશિક્ષકે પાણીની અંદર તેની સાથે અયોગ્ય વર્તન કર્યું હોવાનો ચોંકાવનારો કિસ્સો પ્રકાશમાં આવ્યો છે. આ ઘટનાનો વીડિયો સોશિયલ મીડિયા પર વાયરલ થતા જ હજારો લોકોએ તે પ્રશિક્ષક સામે કડક કાર્યવાહીની માંગ કરી છે.
પાણીની અંદર કેમેરામાં કેદ થઈ ગઈ કરતૂત
રાશા મેડિએને ઇન્સ્ટાગ્રામ પર શેર કરેલા વીડિયોમાં સ્પષ્ટ જોઈ શકાય છે કે ડાઇવિંગ દરમિયાન પ્રશિક્ષક વારંવાર તેને પકડી રહ્યો છે અને અયોગ્ય રીતે સ્પર્શ કરવાનો પ્રયાસ કરી રહ્યો છે. રાશાએ આરોપ લગાવ્યો છે કે પ્રશિક્ષકનું વર્તન શરૂઆતથી જ શંકાસ્પદ હતું, તેથી તેણે સાવચેતીના ભાગરૂપે રેકોર્ડિંગ ચાલુ રાખ્યું હતું. વીડિયોમાં રાશા ઘણી વખત પ્રશિક્ષકથી દૂર જવાનો પ્રયાસ કરતી પણ જોવા મળે છે, છતાં તે તેને સતત પકડી રાખવાનો પ્રયત્ન કરતો હતો.
મહિલાઓને સાવચેત રહેવા અનુરોધ
પોતાના કડવા અનુભવને શેર કરતા રાશાએ અન્ય મહિલા પ્રવાસીઓને ચેતવણી આપી છે. તેણે પ્રશિક્ષકનું નામ પણ જાહેર કર્યું છે જેથી અન્ય કોઈ મહિલા તેની જાળમાં ન ફસાય. રાશાએ મહિલાઓને અપીલ કરી છે કે જો તમને કોઈ પણ પરિસ્થિતિમાં અસ્વસ્થતા લાગે, તો તરત જ પોતાનો પક્ષ રાખો અને ચૂપ ન રહો. આ વીડિયો પર ટિપ્પણી કરતા અનેક મહિલાઓએ મુસાફરી દરમિયાન પોતાની સાથે બનેલી આવી જ સમાન ઘટનાઓ વર્ણવી હતી.
પ્રોફેશનલ ડાઇવિંગ જગતમાં ચર્ચા
આ ઘટના બાદ સ્કુબા ડાઇવિંગ પ્રોફેશનલ્સમાં પણ ચર્ચા જાગી છે. નિષ્ણાતોનું કહેવું છે કે તાલીમ દરમિયાન વિદ્યાર્થીનું સંતુલન જાળવવા કે સાધનો ચેક કરવા માટે સામાન્ય શારીરિક સંપર્ક જરૂરી હોઈ શકે છે, પરંતુ તે હંમેશા વ્યવસાયિક મર્યાદામાં હોવો જોઈએ. રાશાના કિસ્સામાં પ્રશિક્ષકે તમામ નૈતિક માર્ગદર્શિકાઓનું ઉલ્લંઘન કર્યું હોવાનું દેખાય છે. અનેક લોકોએ તેને ડાઇવિંગ સેન્ટર અને આંતરરાષ્ટ્રીય તાલીમ સંસ્થાઓમાં ઔપચારિક ફરિયાદ નોંધાવવાની સલાહ આપી છે.