બેંગલુરુ : મોંઘા થતા જતા LPG સિલિન્ડર અને વૈશ્વિક ઉર્જા સંકટ વચ્ચે આધ્યાત્મિક ગુરુ શ્રી શ્રી રવિશંકરનો એક વીડિયો સોશિયલ મીડિયા પર જોરદાર ચર્ચા જગાવી રહ્યો છે. આ વીડિયોમાં તેઓ રસોઈ માટે એક ક્રાંતિકારી વિકલ્પની વાત કરી રહ્યા છે – 'પાણી'. હા, પાણીનો ઉપયોગ કરીને બળતણ ઉત્પન્ન કરવાની પદ્ધતિ વિશે સમજાવતા શ્રી શ્રી રવિશંકરે સૂચવ્યું છે કે જો આ ટેકનોલોજી સફળ થાય, તો ભારતના કરોડો ઘરોમાં ગેસના બાટલાની જરૂરિયાત ઘટી શકે છે.
કેવી રીતે કામ કરે છે આ સિસ્ટમ?
વાયરલ વીડિયોમાં શ્રી શ્રી રવિશંકર એક ખાસ મશીનનો ઉલ્લેખ કરે છે, જે પાણીમાંથી હાઇડ્રોજન અને ઓક્સિજનને અલગ કરે છે. આ પ્રક્રિયામાં ઉત્પન્ન થયેલા હાઇડ્રોજનનો ઉપયોગ બળતણ તરીકે કરવામાં આવે છે, જ્યારે ઓક્સિજનને પર્યાવરણમાં છોડી દેવામાં આવે છે. તેઓ આ વિચારનો શ્રેય 'મહેશ જી' નામના વ્યક્તિને આપે છે. શ્રી શ્રીના મતે, પાણીની ખૂબ જ ઓછી માત્રામાંથી પણ રસોઈ બનાવી શકાય તેટલી ઉર્જા પેદા કરી શકાય છે.
આરોગ્ય અને પર્યાવરણ માટે વરદાન?
શ્રી શ્રી રવિશંકરે LPG ગેસના વપરાશ સામે આરોગ્યલક્ષી ચિંતાઓ પણ વ્યક્ત કરી છે. તેમણે જણાવ્યું કે LPGની જ્વાળાઓ પર સીધું રાંધેલું ભોજન સ્વાસ્થ્ય માટે હાનિકારક હોઈ શકે છે. તેની સરખામણીમાં હાઇડ્રોજન એ 'ક્લીન ફ્યુઅલ' છે. જ્યારે હાઇડ્રોજન બળે છે, ત્યારે તે કાર્બન ડાયોક્સાઇડને બદલે માત્ર પાણીની વરાળ ઉત્પન્ન કરે છે, જે પ્રદૂષણ ઘટાડવામાં અને રસોડાની હવા શુદ્ધ રાખવામાં મદદરૂપ થઈ શકે છે.
આશ્રમથી ગામડાઓ સુધીની સફર
આર્ટ ઓફ લિવિંગ ફાઉન્ડેશન આ ટેકનોલોજીનું સૌપ્રથમ તેમના આશ્રમમાં પરીક્ષણ કરવાની યોજના બનાવી રહ્યું છે. જો ત્યાં પરિણામો સકારાત્મક આવશે, તો તેને ગ્રામીણ વિસ્તારોમાં પહોંચાડવામાં આવશે. આ પહેલનો મુખ્ય ઉદ્દેશ્ય સામાન્ય માણસને મોંઘા બળતણમાંથી મુક્તિ અપાવવાનો અને આત્મનિર્ભર બનાવવાનો છે.
વૈજ્ઞાનિક પડકારો અને ચર્ચા
જોકે, વિજ્ઞાનની દ્રષ્ટિએ પાણીમાંથી હાઇડ્રોજન અલગ કરવાની પ્રક્રિયા (ઇલેક્ટ્રોલિસિસ) માટે વીજળીની જરૂર પડે છે. સોશિયલ મીડિયા પર ઘણા લોકો આ ટેકનોલોજીના વખાણ કરી રહ્યા છે, તો કેટલાક તેને વ્યવહારિક રીતે કેટલી સસ્તી પડશે તે બાબતે પ્રશ્નો ઉઠાવી રહ્યા છે. તેમ છતાં, મધ્ય પૂર્વમાં ચાલી રહેલા તણાવ અને તેલના ભાવમાં વધારા વચ્ચે આ પ્રકારની ચર્ચાઓએ ભારતમાં સ્વચ્છ ઉર્જાના ભવિષ્ય માટે નવી આશા જન્માવી છે.