તેહરાન  :  પશ્ચિમ એશિયાના રણમેદાનમાં ચાલી રહેલું સત્તા અને અસ્તિત્વનું આ યુદ્ધ હવે તેના સૌથી વિનાશક તબક્કામાં પ્રવેશી ચૂક્યું છે. મંગળવારે યુદ્ધના ૧૧મા દિવસે અમેરિકા અને ઇઝરાયલે સંયુક્ત રીતે ઈરાનના હૃદય સમાન તેહરાન પર અત્યાર સુધીનો સૌથી મોટો હવાઈ હુમલો કર્યો હતો. જેરુસલેમ અને તેલ અવીવમાં આખો દિવસ સાયરનનો ગુંજારવ સંભળાતો રહ્યો, કારણ કે ઈરાને સેંકડો મિસાઇલો અને આત્મઘાતી ડ્રોન દ્વારા ઇઝરાયલને નિશાન બનાવવાનો પ્રયાસ કર્યો હતો. આ સંઘર્ષની આંચ હવે પાડોશી ખાડી દેશો સુધી પણ પહોંચી છે. બહેરીનની રાજધાની મનામામાં એક રહેણાંક ઇમારત પર ઈરાની હુમલો થતાં ૨૯ વર્ષીય મહિલાનું કરૂણ મોત નીપજ્યું છે, જ્યારે સાઉદી અરેબિયા અને કુવૈતે પોતાના આકાશમાં આવતા અનેક ઈરાની ડ્રોનને હવામાં જ તોડી પાડીને મોટા પાયે થનારી જાનહાનિ ટાળી છે. યુએઈના રુવૈસ ઔદ્યોગિક વિસ્તારમાં તેલ ડેપો પર થયેલા હુમલાએ વૈશ્વિક ઉર્જા પુરવઠા માટે જોખમની ઘંટડી વગાડી દીધી છે.

અમેરિકી સંરક્ષણ સચિવ પીટ હેગસેથે આ હુમલાને 'ઇતિહાસનો સૌથી ગંભીર સૈન્ય પ્રહાર' ગણાવ્યો છે. જોઈન્ટ ચીફ્સ ઓફ સ્ટાફ જનરલ ડેન કેનના જણાવ્યા અનુસાર, છેલ્લા ૧૦ દિવસમાં અમેરિકી સેનાએ ઈરાનની બેલિસ્ટિક મિસાઈલ ક્ષમતા અને ડ્રોન નેટવર્કને ખતમ કરવા માટે ૫,૦૦૦થી વધુ લક્ષ્યો પર સચોટ નિશાન સાધ્યું છે. સમુદ્રમાં પણ સ્થિતિ અત્યંત સ્ફોટક છે; યુએસ નેવીએ હોર્મુઝ સ્ટ્રેટમાં ઈરાનનાં ૫૦થી વધુ જહાજો અને નૌકાઓનો નાશ કર્યો છે, જે સમુદ્રી માર્ગમાં સુરંગો બિછાવવાનો પ્રયાસ કરી રહ્યા હતા. બીજી તરફ, ઇઝરાયલી વડાપ્રધાન બેન્જામિન નેતન્યાહૂએ મક્કમતાપૂર્વક જાહેર કર્યું છે કે જ્યાં સુધી ઈરાનની સૈન્ય તાકાત અને સંશોધન કેન્દ્રો સંપૂર્ણપણે રાખ ન થઈ જાય ત્યાં સુધી તેમનું અભિયાન અટકશે નહીં. તેહરાનના રહેવાસીઓના મતે, આજના બોમ્બમારાની તીવ્રતા એટલી પ્રચંડ હતી કે આખું શહેર સતત ધ્રૂજતું રહ્યું હતું.

વૈશ્વિક રાજકારણના આ ગરમાગરમ માહોલમાં હવે રશિયાએ પણ એન્ટ્રી કરી છે. રાષ્ટ્રપતિ વ્લાદિમીર પુતિને ડોનાલ્ડ ટ્રમ્પ સાથે લાંબી વાતચીત કર્યા બાદ મધ્યસ્થી કરવાની ઓફર દોહરાવી છે, જે વિશ્વ માટે આશાનું કિરણ બની શકે છે. આ યુદ્ધની લપેટમાં કતાર અને ઇરાક જેવા દેશો પણ ફસાયા છે, જ્યાં અજાણ્યા હુમલાઓમાં અનેક લડવૈયાઓ માર્યા ગયા છે. શેરબજારો અને તેલના વેપારીઓની નજર હવે વ્હાઇટ હાઉસ પર ટકેલી છે. રોકાણકારોને આશા છે કે ટ્રમ્પ વહીવટીતંત્ર ટૂંક સમયમાં આ રક્તપાત અટકાવવા માટે કોઈ 'ડીલ' કરશે. સોમવારે આસમાને પહોંચેલા તેલના ભાવમાં મંગળવારે જોવા મળેલો આંશિક ઘટાડો એ જ આશાવાદનું પરિણામ છે. જોકે, જમીની હકીકત એ છે કે પશ્ચિમ એશિયા અત્યારે દારૂગોળાના એવા ઢગલા પર બેઠું છે જ્યાં એક નાનકડી ભૂલ સમગ્ર વિશ્વને મહાયુદ્ધમાં હોમી શકે છે.