મુંબઈ : ભારતીય રેલવેમાં ભ્રષ્ટાચાર સામે ચાલી રહેલી ઝુંબેશમાં સેન્ટ્રલ બ્યુરો ઓફ ઇન્વેસ્ટિગેશન (CBI) ને એક મોટી સફળતા મળી છે. મધ્ય રેલવેના એક વરિષ્ઠ અધિકારીએ કરોડોના ટેન્ડરમાં ગેરરીતિ આચરીને જે રીતે સંપત્તિ ભેગી કરી હતી, તેનો ખુલાસો જોઈને સામાન્ય લોકો પણ સ્તબ્ધ થઈ ગયા છે. CBI એ મધ્ય રેલવેના ચીફ ઇલેક્ટ્રિકલ ડિસ્ટ્રિબ્યુશન એન્જિનિયર (CEDE) અને તેમની સાથે સંકળાયેલા બે ખાનગી વ્યક્તિઓની ધરપકડ કરીને કરોડોના લાંચ રેકેટનો ભાંડો ફોડ્યો છે.
40 કરોડના ટેન્ડરની ખેલ અને 40 લાખની લાંચ
આ સમગ્ર મામલો ₹40.54 કરોડના રેલવે પાવર ડિસ્ટ્રિબ્યુશન ટેન્ડર સાથે જોડાયેલો છે. તપાસ મુજબ, 2003 બેચના આ રેલવે અધિકારીએ એક ખાનગી કંપનીને ટેન્ડર અપાવવા માટે સોદાબાજી કરી હતી. એન્જિનિયરે કંપનીના હિસ્સેદારો સાથે મળીને સુનિયોજિત કાવતરું ઘડ્યું અને બદલામાં ₹40 લાખની તોતિંગ લાંચની માંગણી કરી હતી. આ મામલે CBI એ 9 માર્ચે FIR દાખલ કરી હતી.
ઘરમાંથી મળ્યો ખજાનો: રોકડા અને કિલોબંધ ચાંદી
જ્યારે CBI ની ટીમે આ ભ્રષ્ટ અધિકારીના ઘર અને પરિસરની તપાસ કરી, ત્યારે ત્યાંથી મળેલા મુદ્દામાલની ગણતરી કરતા કલાકો વીતી ગયા હતા. તપાસ દરમિયાન અધિકારીના ઘરેથી ₹90.79 લાખ રોકડા મળી આવ્યા હતા. આટલું જ નહીં, 241 ગ્રામ સોનાના દાગીના અને અંદાજે 2.5 કિલો (2577 ગ્રામ) ચાંદીના દાગીના પણ જપ્ત કરવામાં આવ્યા છે. જપ્ત કરાયેલા દાગીના અને રોકડની કુલ કિંમત ₹1.47 કરોડથી વધુ આંકવામાં આવી રહી છે.
ભ્રષ્ટાચાર વિરુદ્ધ કડક સંદેશ
તપાસ એજન્સીના સૂત્રોના જણાવ્યા અનુસાર, આરોપી અધિકારી આ સંપત્તિના સ્ત્રોત વિશે કોઈ સંતોષકારક જવાબ આપી શક્યા નથી. ધરપકડ કરાયેલા ત્રણેય વ્યક્તિઓની અત્યારે સઘન પૂછપરછ ચાલી રહી છે. રેલવે વિભાગની છબી કલંકિત કરનારા આવા કિસ્સાઓ સામે આવ્યા બાદ હવે અન્ય અધિકારીઓ પર પણ કડક નજર રાખવામાં આવી રહી છે. CBI ની આ કાર્યવાહીથી ભ્રષ્ટ તત્વોમાં ફફડાટ વ્યાપી ગયો છે.