શાંતિના દુત કે આતંકના આકા? પાકિસ્તાને લાદેનના ખાસ ગણાતા ૩ આતંકીઓને કાબુલ મોકલ્યા
અફઘાન સરહદે વધતા તણાવ વચ્ચે પાકિસ્તાનનો આ છેલ્લો દાવ
ઈસ્લામાબાદ, તા.૧૧: પાકિસ્તાન અને અફઘાનિસ્તાન વચ્ચે ચાલી રહેલા ભીષણ સીમા વિવાદ અને તેહરીક-એ-તાલિબાન પાકિસ્તાનના વધતા હુમલાઓથી બચવા માટે પાકિસ્તાન સરકારે એક અત્યંત વિવાદાસ્પદ અને ચોંકાવનારું પગલું ભર્યું છે. ઈસ્લામાબાદે ત્રણ કુખ્યાત આતંકવાદી નેતાઓﾗફઝલુર રહેમાન ખલીલ, અબ્દુલ્લા શાહ મઝહર અને કારી સાજિદ ઉસ્માનને પોતાના શાંતિ રાજદૂત બનાવીને કાબુલ મોકલ્યા છે. સત્તાવાર રીતે ભલે તેમને ધાર્મિક નેતાઓ ગણાવવામાં આવે, પરંતુ આ ત્રણેયનો ભૂતકાળ લોહિયાળ રહ્યો છે. ફઝલુર રહેમાન ખલીલ તો એક સમયે ઓસામા બિન લાદેનનો અત્યંત નજીકનો સાથી ગણાતો હતો અને હાલમાં પણ તે પીઓકેમાં આતંકી ટ્રેનિંગ કેમ્પ ચલાવી રહ્યો હોવાના અહેવાલો છે.
આ અસાધારણ મિશન પાછળનો મુખ્ય ઉદ્દેશ્ય તાલિબાનના સર્વોચ્ચ નેતા હિબતુલ્લાહ અખુનઝાદા પાસેથી એક એવો ફતવો મેળવવાનો છે, જે પાકિસ્તાન વિરુદ્ધ ચાલી રહેલા જેહાદ અને આતંકવાદી હિંસાને ગેરકાયદેસર જાહેર કરે. પાકિસ્તાન અત્યારે આર્થિક રીતે પાયમાલ થઈ રહ્યું છે અને ઈરાન સરહદે પણ તણાવ હોવાથી તે અફઘાનિસ્તાન સાથે પૂરજોશમાં યુદ્ધ લડવાની સ્થિતિમાં નથી. તાલિબાને અત્યાર સુધી આ મામલાને પાકિસ્તાનનો આંતરિક વિવાદ ગણાવીને મદદ કરવાનો ઇનકાર કર્યો છે, તેથી પાકિસ્તાને હવે એવા ચહેરાઓનો ઉપયોગ કર્યો છે જેમના સંબંધો તાલિબાનના જૂના લડવૈયાઓ અને કટ્ટરપંથીઓ સાથે વર્ષો જૂના છે.
જોકે, આ રણનીતિ પર અનેક સવાલો ઉઠી રહ્યા છે. એક તરફ પાકિસ્તાન આંતરરાષ્ટ્રીય મંચ પર આતંકવાદ સામે લડવાની વાતો કરે છે અને બીજી તરફ આતંકવાદી સંગઠનોના વડાઓને જ શાંતિ મધ્યસ્થી તરીકે રજૂ કરે છે. અબ્દુલ્લા શાહ મઝહર જેવા નેતાઓ જે જૈશ-એ-મોહમ્મદના મસૂદ અઝહર સાથે જોડાયેલા છે, તેમને રાજદૂત બનાવીને પાકિસ્તાન કદાચ વિશ્વને ગેરમાર્ગે દોરવાનો પ્રયાસ કરી રહ્યું છે. જો આ આતંકવાદી મધ્યસ્થીઓ તાલિબાનને મનાવવામાં નિષ્ફળ રહેશે, તો દક્ષિણ એશિયામાં અફઘાન-પાક સરહદે યુદ્ધની જ્વાળાઓ વધુ પ્રબળ બની શકે છે, જેની સીધી અસર પાકિસ્તાનની અસ્થિર અર્થવ્યવસ્થા પર પડશે.
(2:33 PM IST)
છેલ્લા 8 દિવસમાં સૌથી લોકપ્રિય 
