દુબઈ:  દુબઈની ઝાકઝમાળ વચ્ચે હવે એક એવું કૌભાંડ સામે આવ્યું છે જેણે સ્થાનિક પ્રશાસન અને રહેવાસીઓને ચોંકાવી દીધા છે. પવિત્ર રમઝાન માસ દરમિયાન લોકોની ઉદારતા અને ધાર્મિક આસ્થાનો ગેરલાભ ઉઠાવવા માટે વિદેશી ગેંગ સક્રિય થઈ છે. દુબઈ પોલીસે તાજેતરમાં જ 'કોમ્બેટ અગેઇન્સ્ટ બેગિંગ' અભિયાન હેઠળ 13 એવા શાતિર ભિખારીઓની ધરપકડ કરી છે જેઓ માત્ર વિઝિટ વિઝા પર ખાસ ભીખ માંગવાના ઈરાદે જ અમીરાત આવ્યા હતા. આ ધરપકડ દરમિયાન જે ખુલાસા થયા છે તે આશ્ચર્યજનક છે; પોલીસના હાથે એક એવો શખ્સ ઝડપાયો છે જે દિવસભર રસ્તાઓ પર લાચારીનું નાટક કરીને ભીખ માંગતો હતો, પરંતુ તપાસ કરતા જાણવા મળ્યું કે તે શખ્સ એક-બે નહીં પણ ત્રણ લક્ઝરી કારનો માલિક છે. આ ભિખારીઓ દિવસ પૂરો થતા જ પોતાના ફાટેલા કપડાં બદલીને મોંઘીદાટ ગાડીઓમાં સવાર થઈ આલીશાન જીવન જીવતા હતા.

ક્રાઈમ ડિપાર્ટમેન્ટના ડિરેક્ટર બ્રિગેડિયર અલી સલેમ અલ શમ્સીએ ખુલાસો કર્યો છે કે આ ધરપકડ કરાયેલા લોકોમાંથી 90 ટકા ભિખારીઓ ટૂરિસ્ટ વિઝા પર દુબઈમાં પ્રવેશ્યા છે. આ ટોળકીઓ ચોક્કસ પ્લાનિંગ સાથે મસ્જિદો, ક્લિનિક્સ, હોસ્પિટલો અને ભીડભાડવાળા બજારોને પોતાનું નિશાન બનાવે છે. તેઓ એવી બનાવટી વાર્તાઓ ઘડે છે કે જાણે તેઓ દેશમાં ફસાઈ ગયા હોય અથવા ગંભીર બીમારીથી પીડાતા હોય, જેથી લોકો સહાનુભૂતિમાં આવીને તેમને મોટી રકમ આપી દે છે. પોલીસે સ્પષ્ટ કર્યું છે કે આ કોઈ લાચાર લોકો નથી પરંતુ એક સુઆયોજિત આંતરરાષ્ટ્રીય સિન્ડિકેટ છે જે રમઝાનના મહિનામાં કરોડોની કમાણી કરવાના લક્ષ્ય સાથે કામ કરે છે.

આ વધતા જતા જોખમને જોતા દુબઈ પોલીસે રહેવાસીઓ માટે કડક ચેતવણી જારી કરી છે અને તેમને રસ્તા પર ભીખ આપવાને બદલે અધિકૃત ચેરિટેબલ સંસ્થાઓ દ્વારા જ દાન આપવા અનુરોધ કર્યો છે. પોલીસે 901 હેલ્પલાઇન નંબર અને 'પોલીસ આઈ' જેવી સ્માર્ટ એપ દ્વારા આવા તત્વોની તાત્કાલિક જાણ કરવા લોકોને અપીલ કરી છે. પોલીસનું કહેવું છે કે ભિક્ષાવૃત્તિ એ માત્ર સામાજિક બદી નથી પરંતુ તે રાષ્ટ્રીય સુરક્ષા અને દેશની પ્રતિષ્ઠા માટે પણ ખતરો છે. હવે પોલીસ સોશિયલ મીડિયા અને સીસીટીવી કેમેરા દ્વારા આ 'હાઈ-પ્રોફાઈલ' ભિખારીઓ પર બાજ નજર રાખી રહી છે જેથી કરીને પવિત્ર માસમાં કોઈની ઉદારતાનો ખોટો ફાયદો ન  ઉઠાવી શકાય.