નવી દિલ્હી:   ભારતીય સંસદીય ઈતિહાસમાં લગભગ 40 વર્ષ બાદ લોકસભા સ્પીકર સામે અવિશ્વાસ પ્રસ્તાવ લાવવાની ઘટનાએ રાજકીય ગરમાવો લાવી દીધો છે. આ મુદ્દે ગર્જતા કેન્દ્રીય ગૃહમંત્રી અમિત શાહે વિપક્ષના આ પગલાને અત્યંત "ખેદજનક" અને લોકશાહીની ગરિમાને ઠેસ પહોંચાડનારું ગણાવ્યું હતું. શાહે ભારપૂર્વક જણાવ્યું કે સ્પીકરનું પદ સર્વોચ્ચ છે અને તેમની નિમણૂક શાસક પક્ષ તેમજ વિપક્ષ બંનેના સહયોગથી કરવામાં આવી હતી. સ્પીકરની પ્રામાણિકતા પર પ્રશ્ન ઉઠાવવો એ માત્ર ગૃહનું જ નહીં, પરંતુ ભારતની લોકતાંત્રિક પરંપરાઓનું વિશ્વ સ્તરે અપમાન કરવા સમાન છે. તેમણે યાદ અપાવ્યું કે ભાજપ જ્યારે વિપક્ષમાં હતું ત્યારે પણ તેમણે ક્યારેય સ્પીકરના પદની ગરિમાને આવી રીતે નુકસાન પહોંચાડ્યું નહોતું.

અમિત શાહે પોતાના સંબોધનમાં સ્પષ્ટ કર્યું કે લોકસભા એ કોઈ 'મેળો' નથી પરંતુ દેશની સર્વોચ્ચ પંચાયત છે, જે ચોક્કસ નિયમો અને શિસ્ત પર ચાલે છે. તેમણે વિપક્ષ પર કટાક્ષ કરતા કહ્યું કે જે સભ્યો પોતે વિશેષાધિકારના ભ્રમમાં જીવે છે અને નિયમોનું ઉલ્લંઘન કરે છે, તેમને જનતા ક્યારેય માફ કરતી નથી અને એટલે જ તેમનો પક્ષ સતત સંકોચાઈ રહ્યો છે. શાહના મતે, સ્પીકર પાસે નિયમ વિરુદ્ધ બોલનાર સભ્યોને રોકવાનો અને ગૃહની બહાર કાઢવાનો સંપૂર્ણ અધિકાર છે અને આ નિર્ણય પર શંકા કરવી એ સંસદીય પ્રક્રિયાની વિશ્વસનીયતા પર પ્રહાર કરવા જેવું છે.

છેલ્લા 75 વર્ષમાં ભારતીય લોકશાહીએ પાતાળથી પણ ઉંડો પાયો નાખ્યો હોવાનું જણાવતા ગૃહમંત્રીએ વિપક્ષને આત્મમંથન કરવાની સલાહ આપી હતી. તેમણે કહ્યું કે ગૃહના વડા પર આરોપ લગાવવાથી સમગ્ર વિશ્વમાં ખોટો સંદેશ જાય છે, જે ભારતની વધતી પ્રતિષ્ઠા માટે નુકસાનકારક છે. અમિત શાહે અંતમાં લલકારતા કહ્યું કે કોઈ પણ સભ્ય ગમે ત્યારે ઊભા થઈને બોલી શકતું નથી; સંસદમાં દરેક કાર્યવાહી નિયમો મુજબ થવી જોઈએ. આ ચર્ચાએ સ્પષ્ટ કરી દીધું છે કે આગામી દિવસોમાં સત્તાધારી પક્ષ અને વિપક્ષ વચ્ચેનો સંઘર્ષ વધુ તીવ્ર બની શકે છે.