લંડન:  ઇટાલીના વડાપ્રધાન જ્યોર્જિયા મેલોનીના તાજેતરના ફોટોગ્રાફ્સ માત્ર એક નેતાની ચિંતા નથી, પરંતુ તે સમગ્ર યુરોપની લાચારીનું જીવંત પ્રતિક બની રહ્યા છે. ડોનાલ્ડ ટ્રમ્પ અને ઇઝરાયલ દ્વારા ઈરાન પર કરવામાં આવેલા અચાનક અને આક્રમક હુમલાએ યુરોપિયન દેશોને ઊંડી રાજદ્વારી કટોકટીમાં મૂકી દીધા છે. મેલોનીની નીચી નજર અને ચહેરા પરની રેખાઓ સ્પષ્ટ કરે છે કે વોશિંગ્ટને તેના જૂના સાથીઓને વિશ્વાસમાં લીધા વિના આટલો મોટો લશ્કરી નિર્ણય લેતા યુરોપમાં ભારે રોષ છે. ઇટાલી માટે સૌથી મોટો ખતરો ભૂમધ્ય સમુદ્રમાં વ્યાપાર માર્ગો બ્લોક થવાનો અને ઉર્જા પુરવઠો ખોરવાવાનો છે, જે મેલોની સરકાર માટે આર્થિક અને રાજકીય અસ્થિરતાનું કારણ બની શકે છે.

યુદ્ધના આ મેદાનમાં નાટો ની એકતાના લીરેલીરા ઉડી ગયા છે. એક તરફ બ્રિટન પોતાની જૂની વફાદારી નિભાવતા ગલ્ફમાં યુદ્ધ જહાજો તૈનાત કરી અમેરિકાના 'સૈનિક' તરીકે ઉભરી રહ્યું છે, તો બીજી તરફ ફ્રાન્સના રાષ્ટ્રપતિ ઇમેન્યુઅલ મેક્રોને સ્પષ્ટ કરી દીધું છે કે ફ્રાન્સ આ આત્મઘાતી યુદ્ધમાં અમેરિકાની પાછળ આંખો મીંચીને નહીં ચાલે. મેલોની અત્યારે બેવડી મુશ્કેલીમાં ફસાયા છે; જો તે ટ્રમ્પને ટેકો આપે તો આરબ દેશો સાથેના ઉર્જા સંબંધો બગડે અને જો ન આપે તો નાટોની પ્રતિબદ્ધતાઓ જોખમમાં મુકાય. જર્મની અને અન્ય સભ્યો આ લશ્કરી હસ્તક્ષેપને વિનાશકારી માની રહ્યા છે, જે સૂચવે છે કે ભવિષ્યમાં નાટોના સભ્યો વચ્ચેનો અવિશ્વાસ સંસ્થાના અસ્તિત્વ સામે પ્રશ્નાર્થ ચિહ્ન ઉભો કરી શકે છે.

યુરોપનું ભવિષ્ય હવે હોર્મુઝ સ્ટ્રેટ  ના ભાવિ પર ટકેલું છે. જો ઈરાન આ માર્ગ બંધ કરી દે છે, તો યુરોપની અર્થવ્યવસ્થા પત્તાના મહેલની જેમ તૂટી પડશે. મેલોનીના મૌન પાછળ એક ભયંકર તોફાન પહેલાની શાંતિ છુપાયેલી છે, કારણ કે ઇટાલીની અંદર પણ હવે યુદ્ધ વિરોધી અવાજો ઉગ્ર બન્યા છે. ટ્રમ્પ અને ઇઝરાયલની આ મિલીભગતે યુરોપને એક એવા અજાણ્યા રસ્તે લાવીને ઊભું કરી દીધું છે જ્યાંથી પાછા વળવું અશક્ય છે. મેલોનીના તણાવપૂર્ણ હાવભાવ એ વાતની સાક્ષી પૂરે છે કે યુરોપ હવે માત્ર એક પ્રેક્ષક બનીને રહી ગયું છે, જેની પાસે ન તો પોતાની સુરક્ષાની કોઈ નક્કર યોજના છે, ન તો યુદ્ધ રોકવાની શક્તિ.