નવી દિલ્હી : પશ્ચિમ એશિયામાં સર્જાયેલી યુદ્ધ જેવી પરિસ્થિતિને પગલે ભારત સરકાર એક્શન મોડમાં આવી છે. ભારતના નાગરિક ઉડ્ડયન મંત્રાલયે ખાડી દેશોમાં ફસાયેલા ભારતીયોની સુરક્ષિત વાપસી અને અવિરત હવાઈ મુસાફરી સુનિશ્ચિત કરવા માટે મોટો પ્લાન તૈયાર કર્યો છે. ૧૨ માર્ચ, ૨૦૨૬ થી ભારત અને પશ્ચિમ એશિયા વચ્ચે કનેક્ટિવિટી વધારવા માટે એરલાઇન્સ નવી ફ્લાઇટ્સ શરૂ કરવા જઈ રહી છે.
રિયાધ માટે નવી કનેક્ટિવિટી અને મસ્કતનો આકસ્મિક પ્લાન
સરકારના નવા આયોજન મુજબ, ૧૨ માર્ચથી એર ઇન્ડિયા, એર ઇન્ડિયા એક્સપ્રેસ અને ઇન્ડિગો રિયાધ (સાઉદી અરેબિયા) માટે મુંબઈથી નવી ફ્લાઇટ્સ શરૂ કરશે. સૌથી મહત્વનો નિર્ણય ‘વૈકલ્પિક એરપોર્ટ’ અંગે લેવાયો છે. જો દુબઈ, અબુ ધાબી કે જેદ્દાહ જેવા એરપોર્ટ્સ પર કોઈ જોખમ ઉભું થાય, તો ભારતીય વિમાનો મસ્કત આંતરરાષ્ટ્રીય એરપોર્ટનો વૈકલ્પિક આશ્રયસ્થાન તરીકે ઉપયોગ કરી શકશે. DGCA એ આ માટેની જરૂરી મંજૂરીઓ આપી દીધી છે.
યુદ્ધ વચ્ચે પણ મુસાફરોની અવરજવર ચાલુ
તાજેતરના આંકડા મુજબ, ૯ માર્ચના રોજ ભારતીય કેરિયર્સે પશ્ચિમ એશિયાથી ૪૫ ફ્લાઇટ્સ સફળતાપૂર્વક ચલાવી હતી, જેના દ્વારા ૭,૪૦૭ મુસાફરો સુરક્ષિત રીતે ભારત પરત ફર્યા છે. સ્પાઇસજેટ અને અકાસા એરને પણ પ્રવર્તમાન સ્થિતિ મુજબ પોતાની કામગીરી ગોઠવવા અને મુસાફરોની સુરક્ષાને પ્રાથમિકતા આપવા સૂચના આપવામાં આવી છે.
ટિકિટના ભાવ પર સરકારની ‘વોચ’
યુદ્ધના સંકટ સમયે એરલાઇન્સ મુસાફરો પાસેથી વધુ ભાડું ન વસૂલે તે માટે મંત્રાલય સતત હવાઈ ભાડાનું નિરીક્ષણ કરી રહ્યું છે. નાગરિક ઉડ્ડયન મંત્રી કિંજરાપુ રામ મોહન નાયડુએ સ્પષ્ટ કર્યું છે કે ટિકિટના ભાવ વાજબી રહેવા જોઈએ. મુસાફરોને સલાહ આપવામાં આવી છે કે તેઓ મુસાફરી કરતા પહેલા પોતાની એરલાઇન્સ પાસેથી ફ્લાઇટના લેટેસ્ટ અપડેટ્સ મેળવતા રહે.
ભારત સરકારની આ આગોતરી તૈયારીઓથી પશ્ચિમ એશિયામાં વસતા લાખો ભારતીયોને મુશ્કેલ સમયમાં મોટી રાહત મળવાની આશા છે.