મુંબઈ:બિહારની ધરતી ફરી એકવાર પોતાની પ્રતિભાને કારણે દેશભરમાં ચર્ચાનું કેન્દ્ર બની છે. ભાગલપુર જિલ્લાના નવગછિયાની રહેવાસી આશાસ્પદ નૃત્યાંગના ગરિમા ચૌધરીએ ‘ઇન્ડિયાઝ બેસ્ટ ડાન્સર’ શોમાં ટોપ-30માં સ્થાન મેળવીને રાજ્યનું ગૌરવ વધાર્યું છે. ગરિમાની આ સફળતા તેના અવિરત સમર્પણ અને નૃત્ય પ્રત્યેના લગાવનું પરિણામ છે.
  અત્રે ઉલ્લેખનીય છે કે ગરિમાએ અગાઉ ૨૦૨૩માં આ શોની ત્રીજી સીઝનમાં ભાગ લીધો હતો. તે સમયે તે ફાઈનલ સુધી પહોંચી શકી નહોતી, પરંતુ હાર માનવાને બદલે તેણે પોતાની ખામીઓ પર કામ કર્યું અને વધુ મહેનત કરી. બે વર્ષની સખત પ્રેક્ટિસ બાદ હવે તેણે ફરી એકવાર મુંબઈમાં પોતાની પ્રતિભા સાબિત કરી છે. હાલમાં તે ૧૨માં ધોરણમાં અભ્યાસ કરી રહી છે અને બોર્ડની પરીક્ષાઓ પૂર્ણ કર્યા બાદ તે મુંબઈમાં આગામી રાઉન્ડમાં ભાગ લેશે.
નાની ઉંમરમાં ગરિમાએ અનેક મોટા પ્રોજેક્ટ્સમાં કામ કર્યું છે. તેણે પ્રખ્યાત ગાયક અરિજિત સિંહ સાથે સ્ટેજ પર પરફોર્મ કર્યું છે, જે કોઈ પણ કલાકાર માટે મોટી સિદ્ધિ ગણાય છે. આ ઉપરાંત, તેણે તાજેતરમાં રિલીઝ થયેલા પંજાબી ગીત "ટોલી", એક વેબ સિરીઝ અને અનેક સંગીત આલ્બમ્સમાં બેકગ્રાઉન્ડ ડાન્સર તરીકે પણ પોતાની કુશળતા દર્શાવી છે.
ગરિમાના પિતા શંકર ચૌધરી પોતે દિલ્હીમાં ડાન્સ કોચિંગ સેન્ટર ચલાવે છે અને તેમણે જ ગરિમાને તાલીમ આપી છે. તેમના જણાવ્યા મુજબ, ગરિમા બાળપણથી જ નૃત્ય પ્રત્યે ઉત્સાહી હતી. હવે તેની નજર ટોપ-૧૨માં સ્થાન મેળવીને ટાઇટલ જીતવા પર છે. ગરિમાની આ સફળતાના સમાચાર મળતા જ ભાગલપુર અને નવગછિયામાં ખુશીની લહેર ફેલાઈ ગઈ છે અને લોકો તેને સોશિયલ મીડિયા પર અભિનંદન પાઠવી રહ્યા છે