લંડન (બ્રિટન), તા. 12: બ્રિટનના પીટરબરો શહેરમાં સ્થિત 'ભારત હિન્દુ સમાજ' મંદિરની જમીન વેચી દેવાના કાઉન્સિલના નિર્ણય સામે સ્થાનિક હિન્દુ સમુદાયે આક્રમક વલણ અપનાવ્યું છે. બ્રિટનના હિન્દુ ફોરમ (HFB) દ્વારા સેક્રેટરી ઓફ સ્ટેટ સ્ટીવ રીડને પત્ર પાઠવીને કાઉન્સિલના આ પગલા સામે સખત વાંધો ઉઠાવવામાં આવ્યો છે. સમુદાયનો આરોપ છે કે કાઉન્સિલ ધાર્મિક અને સાંસ્કૃતિક લાગણીઓને બાજુ પર મૂકીને માત્ર આર્થિક ફાયદા માટે આ નિર્ણય લઈ રહી છે.
સમજૂતીનો ભંગ અને 'ખુલ્લા બજાર'નો ખેલ
છેલ્લા એક દાયકાથી મંદિર સમુદાય અને કાઉન્સિલ વચ્ચે જમીનની માલિકી અંગે વાટાઘાટો ચાલી રહી હતી. મંદિર દ્વારા જમીન ખરીદવા માટે બોલી પણ લગાવવામાં આવી હતી, પરંતુ કાઉન્સિલે અચાનક પ્રક્રિયા બદલી નાખી. HFB મુજબ, "પ્રક્રિયાને અચાનક બદલીને તેને ખુલ્લા બજારમાં 'શ્રેષ્ઠ ઓફર' અભિગમમાં ફેરવી દેવામાં આવી, અને સમુદાયને નવી સ્પર્ધાત્મક બોલી તૈયાર કરવા માટે માત્ર એક મહિનાનો સમય અપાયો." આ અન્યાયી વલણથી ભક્તોમાં ભારે અસંતોષ જોવા મળી રહ્યો છે.
14,000 ભક્તોની આસ્થાનું કેન્દ્ર
પીટરબરો અને તેની આસપાસના 35 માઇલના ત્રિજ્યામાં આ એકમાત્ર હિન્દુ મંદિર છે, જ્યાં અંદાજે 14,000 થી વધુ ભક્તો દર્શનાર્થે આવે છે. HFB ના પ્રમુખ તૃપ્તિ પટેલે જણાવ્યું હતું કે, કાઉન્સિલના નિર્ણયથી સમુદાયના વિશ્વાસને મોટું નુકસાન થયું છે. તેમણે પ્રશ્ન ઉઠાવ્યો હતો કે શું નિર્ણય લેતા પહેલા કાઉન્સિલરો પાસે મંદિરના સાંસ્કૃતિક મહત્વ અને ઇતિહાસની પૂરતી માહિતી હતી?
સરકારના હસ્તક્ષેપની માંગ
હિન્દુ ફોરમે બ્રિટિશ સરકારને વિનંતી કરી છે કે આ બાબતને પુનર્વિચારણા માટે કાઉન્સિલને પાછી મોકલવામાં આવે. સમુદાય ઈચ્છે છે કે તેમને સાંભળવામાં આવે અને કોઈપણ નવી પ્રક્રિયામાં ભાગ લેવાની વાજબી તક આપવામાં આવે. ભક્તોનું કહેવું છે કે જો કાઉન્સિલ આ નિર્ણય પાછો નહીં ખેંચે તો તેઓ આંદોલન વધુ તેજ બનાવશે. આ વિવાદ હવે બ્રિટનના રાજકારણમાં પણ ચર્ચાનો વિષય બન્યો છે, કારણ કે તે લઘુમતી સમુદાયની ધાર્મિક સ્વતંત્રતા અને હિતો સાથે જોડાયેલો છે.