જયપુર (રાજસ્થાન):રાજસ્થાનના ફૂડ સેફ્ટી વિભાગે જયપુરમાં એક સ્થાનિક વિતરણ કંપની પર દરોડા પાડીને અમૂલ બ્રાન્ડની એક્સપાયરી ડેટવાળી આશરે ૧.૫ લાખ કિલોગ્રામ ખાદ્ય ચીજવસ્તુઓનો નાશ કર્યો છે. આ કંપની એક્સપાયરી ડેટ નજીક હોય તેવી પ્રોડક્ટ્સ સસ્તા ભાવે ખરીદીને પેકેજિંગ પરની તારીખો સાથે છેડછાડ કરી બજારમાં વેચતી હોવાનું બહાર આવ્યું છે.

હેલ્પલાઈન પરની ફરિયાદથી ખુલ્લું પડ્યું કૌભાંડ:
આરોગ્ય વિભાગના પ્રિન્સિપલ સેક્રેટરી ગાયત્રી રાઠોડના જણાવ્યા અનુસાર, રાજ્ય સરકારની ૧૮૧ હેલ્પલાઈન પર ખો નાગોરિયન વિસ્તારમાં આવેલી 'એથ્લેટ ડિસ્ટ્રીબ્યુટર' (M/s Athlete Distributor) નામની પેઢીની શંકાસ્પદ પ્રવૃત્તિઓ અંગે ફરિયાદ મળી હતી. આ ફરિયાદને આધારે જયપુર-II ના ચીફ મેડિકલ અને હેલ્થ ઓફિસર (CMHO) ની ટીમે વેરહાઉસ પર દરોડો પાડ્યો હતો. તપાસ દરમિયાન ત્યાંથી નૂડલ્સ, કેચઅપ, મેયોનીઝ અને એનર્જી ડ્રિંક્સના અંદાજે ૧૨,૦૦૦ કાર્ટન જપ્ત કરવામાં આવ્યા હતા.

યુટ્યુબથી શીખ્યો તારીખ ભૂંસવાની કરામત::
ફૂડ સેફ્ટી કમિશનર ટી. શુભમંગલાના જણાવ્યા મુજબ, આ ફેક્ટરીમાં ૧૦ થી ૧૨ કામદારો અંદર ગયા બાદ આખો દિવસ મુખ્ય દરવાજો બંધ રાખવામાં આવતો હતો. એડિશનલ કમિશનર ભગવત સિંહે જણાવ્યું હતું કે પેઢીના સંચાલક ગગન આહુજાએ કબૂલાત કરી હતી કે તેણે યુટ્યુબ (YouTube) પર વીડિયો જોઈને એક્સપાયરી ડેટ કેવી રીતે બદલવી તે શીખ્યું હતું. તપાસ દરમિયાન અધિકારીઓએ થિનર, એસીટોન અને અન્ય કેમિકલ્સની બોટલો પણ રિકવર કરી છે, જેનો ઉપયોગ જૂની તારીખો ભૂંસવા માટે કરવામાં આવતો હતો.

રી-પેકેજિંગનું સુનિયોજિત નેટવર્ક:
તપાસમાં અધિકારીઓને અંદાજે ૪,૫૦૦ જેટલા અમૂલ બ્રાન્ડના નવા કોરા કાર્ટન મળી આવ્યા છે, જેનો ઉપયોગ એક્સપાયરી ડેટ બદલ્યા બાદ માલ ફરીથી પેક કરવા માટે થતો હતો. આશરે ૩,૦૦૦ જેટલા કાર્ટન પરથી પ્રિન્ટેડ તારીખો પહેલેથી જ ભૂંસી નાખવામાં આવી હતી. આ મામલે અમૂલ કંપની દ્વારા હજુ સુધી કોઈ સત્તાવાર નિવેદન બહાર પાડવામાં આવ્યું નથી.

૨૭ ટ્રક ભરીને અખાદ્ય જથ્થાનો નાશ:
જપ્ત કરવામાં આવેલી એક્સપાયર્ડ પ્રોડક્ટ્સને સતત ચાર દિવસ સુધી ૨૭ ટ્રકો દ્વારા ડમ્પિંગ યાર્ડમાં લઈ જઈને નાશ કરવામાં આવ્યો હતો. આ સમગ્ર પરિવહનનો ખર્ચ પણ ડિસ્ટ્રીબ્યુટર પાસેથી જ વસૂલવામાં આવ્યો છે. હાલ સત્તાવાળાઓ એ તપાસ કરી રહ્યા છે કે આ ઝેરી અને અખાદ્ય જથ્થો બજારમાં કેટલી માત્રામાં પહોંચી ચૂક્યો છે. (ઝી ઈંગ્લીશ સાઈટમાંથી સાભાર)