નવી દિલ્હી:  પશ્ચિમ એશિયામાં ભભૂકી રહેલા યુદ્ધની જ્વાળાઓ હવે સીધી ભારતીય રસોડા સુધી પહોંચી છે. હોર્મુઝ સ્ટ્રેટ  અવરોધિત થવાને કારણે વૈશ્વિક સ્તરે એલપીજી પુરવઠાને માઠી અસર પડી છે, જેને પગલે ભારત સરકારે ગેસ બુકિંગના નિયમોમાં મોટો ફેરફાર કર્યો છે. પેટ્રોલિયમ મંત્રાલયના સંયુક્ત સચિવ સુજાતા શર્માએ જાહેરાત કરી છે કે હવે ગ્રામીણ વિસ્તારોમાં ગ્રાહકો દર 45 દિવસે માત્ર એક જ વાર સિલિન્ડર બુક કરાવી શકશે. શહેરી વિસ્તારોમાં પણ આ મર્યાદા 21 દિવસથી વધારીને 25 દિવસ કરવામાં આવી છે. સરકારનું કહેવું છે કે ગેસની અછત નથી, પરંતુ લોકો ગભરાટમાં આવીને વધારાના સિલિન્ડર બુક ન કરે તે માટે આ નિયંત્રણો લાદવામાં આવ્યા છે.

ભારત માટે આ કટોકટી નવી વ્યુહરચના ઘડવાનો સમય બની રહી છે. હોર્મુઝનો માર્ગ બંધ થતા ભારતે તેના તેલ અને ગેસની આયાતના માર્ગો બદલ્યા છે. હાલમાં ભારતની 70% આયાત એવા વૈકલ્પિક રસ્તાઓ દ્વારા થઈ રહી છે જે યુદ્ધગ્રસ્ત વિસ્તારોથી દૂર છે. આ ઉપરાંત, દેશની રિફાઇનરીઓ અત્યારે 100% થી વધુની ક્ષમતા પર રાત-દિવસ કામ કરી રહી છે જેથી પુરવઠો જાળવી શકાય. સરકારે ખાતરી આપી છે કે એકવાર બુકિંગ થયા બાદ અઢી દિવસની અંદર સિલિન્ડરની ડિલિવરી ગ્રાહકના ઘરે પહોંચાડી દેવામાં આવશે, તેથી નાગરિકોએ ખોટી અફવાઓથી ગભરાવાની જરૂર નથી.

બીજી તરફ, સરકારે હોસ્પિટલો અને શૈક્ષણિક સંસ્થાઓ જેવી આવશ્યક સેવાઓ માટે ગેસના પુરવઠામાં કોઈ કમી ન આવે તે માટે તેમને પ્રાથમિકતા આપી છે. પર્યાવરણ મંત્રાલયે પણ સૂચન કર્યું છે કે જ્યાં સુધી સ્થિતિ સામાન્ય ન થાય ત્યાં સુધી બાયોમાસ અને અન્ય અસ્થાયી ઇંધણનો ઉપયોગ પણ વિકલ્પ તરીકે કરી શકાય છે. ભારતે પોતાની ઉર્જા સુરક્ષા વધારતા હવે 27 ને બદલે 40 દેશો પાસેથી તેલ અને ગેસની ખરીદી શરૂ કરી છે, જેનાથી ભવિષ્યમાં કોઈપણ એક વિસ્તારના સંઘર્ષની અસર ભારત પર ઓછી પડે. ભારત અત્યારે દરરોજ 5.5 મિલિયન બેરલ ક્રૂડનો ઉપયોગ કરી રહ્યું છે અને સરકાર આ આંકડો જાળવી રાખવા કટિબદ્ધ છે.