નવી દિલ્હી : ભારત સરકાર દ્વારા ગુરુવારે જાહેર કરવામાં આવેલા સત્તાવાર આંકડા મુજબ, દેશના છૂટક ફુગાવામાં જાન્યુઆરીની સરખામણીએ ફેબ્રુઆરીમાં વધારો જોવા મળ્યો છે. ફેબ્રુઆરીમાં છૂટક ફુગાવો વધીને 3.21 ટકા પર પહોંચી ગયો છે, જે જાન્યુઆરીમાં 2.75 ટકા નોંધાયો હતો. જોકે, રાહતની વાત એ છે કે આ આંકડો હજુ પણ ભારતીય રિઝર્વ બેંક (RBI) ની 2 થી 6 ટકાની નિર્ધારિત મર્યાદાની અંદર જ રહ્યો છે.
નવા માળખા હેઠળ ડેટાની જાહેરાત
નોંધનીય છે કે, આ બીજી વખત છે જ્યારે સરકારે 2024 ને 'આધાર વર્ષ' તરીકે ગણીને ફુગાવાના આંકડા જાહેર કર્યા છે. અગાઉ 2012 ને આધાર વર્ષ ગણવામાં આવતું હતું. આ નવા ફેરફાર સાથે, દેશમાં વપરાશની પેટર્ન બદલાઈ છે, જેમાં ખાદ્ય પદાર્થોનું મહત્વ (વેઇટેજ) પહેલીવાર 40 ટકાથી નીચે ઘટ્યું છે, જ્યારે બિન-ખાદ્ય શ્રેણીઓનો હિસ્સો 60 ટકાથી વધુ થયો છે. આ ફેરફાર દેશના આધુનિક ઘરગથ્થુ ખર્ચને વધુ સચોટ રીતે દર્શાવે છે.
ખાદ્ય ફુગાવો અને પ્રાદેશિક તફાવત
ફેબ્રુઆરીમાં ખાદ્ય ફુગાવો 3.47 ટકા રહ્યો હતો, જે ગયા વર્ષના સમાન ગાળાના 2.13 ટકા કરતા નોંધપાત્ર રીતે વધારે છે. ગ્રામીણ વિસ્તારોમાં ફુગાવો 3.37 ટકા રહ્યો, જ્યારે શહેરી વિસ્તારોમાં તે 3.02 ટકા નોંધાયો હતો. રાજ્યોની વાત કરીએ તો, તેલંગાણા 5 ટકા ફુગાવા સાથે દેશમાં સૌથી મોંઘું રાજ્ય રહ્યું છે. ત્યારબાદ રાજસ્થાન, કેરળ અને આંધ્રપ્રદેશમાં પણ ફુગાવાનો દર રાષ્ટ્રીય સરેરાશ કરતા વધુ જોવા મળ્યો છે.
યુદ્ધની અસર અને આગામી અંદાજ
વીજળી અને ગેસ જેવા ઇંધણના ફુગાવામાં હાલમાં માત્ર 0.14 ટકાનો નજીવો વધારો થયો છે, પરંતુ પશ્ચિમ એશિયામાં ચાલી રહેલા અમેરિકા-ઈઝરાયલ-ઈરાન યુદ્ધને કારણે ચિંતા વધી છે. તેલ અને ગેસના પુરવઠામાં જે રીતે વિક્ષેપ પડી રહ્યો છે, તેને જોતા નિષ્ણાતો માની રહ્યા છે કે માર્ચ મહિનામાં ઇંધણ અને વીજળીના ભાવમાં મોટો ઉછાળો આવી શકે છે. માર્ચના ફુગાવાના આંકડા હવે 13 એપ્રિલે જાહેર કરવામાં આવશે.