ફોર્બ્સગંજ, તા. ૧૩: બિહારના અરરિયા જિલ્લાના ફોર્બ્સગંજ શહેરમાંથી એક અત્યંત ચોંકાવનારો કિસ્સો પ્રકાશમાં આવ્યો છે. અહીંના પોખર બસ્તી વિસ્તારમાં એક ઘર અને દુકાનમાં ગેરકાયદેસર રીતે સંગ્રહિત કરવામાં આવેલા આશરે ૨૫૦ જેટલા એલપીજી સિલિન્ડરનો જથ્થો વહીવટીતંત્રે જપ્ત કર્યો છે. સબ-ડિવિઝનલ ઓફિસર (SDO) અભય કુમારના નેતૃત્વમાં પાડવામાં આવેલા આ દરોડાએ સમગ્ર પંથકમાં ચકચાર મચાવી દીધી છે.
ઘરની છત પર પણ હતા સિલિન્ડર!
તંત્રને બાતમી મળી હતી કે સાબીર અંસારી અને તેનો પુત્ર ઇમરાન અંસારી મોટા પાયે ગેસ સિલિન્ડરની કાળાબજારી કરી રહ્યા છે. જ્યારે પોલીસ ફોર્સ સાથે અધિકારીઓ દરોડો પાડવા પહોંચ્યા, ત્યારે મકાનના અંદરના રૂમ તો ઠીક, પણ છત પર પણ સિલિન્ડરોનો ઢગલો જોઈને અધિકારીઓ પણ દંગ રહી ગયા હતા. રહેણાંક મકાનમાંથી ૧૫૦ અને નજીકની બંધ દુકાનનું શટર તોડતા અન્ય ૧૦૦ જેટલા સિલિન્ડર મળી આવ્યા હતા. જેમાં ભારત, એચપી અને ઇન્ડેન એમ ત્રણેય કંપનીના ખાલી અને ભરેલા સિલિન્ડરોનો સમાવેશ થાય છે.
મોટી હોનારત ટળી
જે વિસ્તારમાં આ જથ્થો પકડાયો છે તે અત્યંત ગીચ વસ્તી ધરાવે છે. આટલી મોટી માત્રામાં ગેસ સિલિન્ડરનો ગેરકાયદે સંગ્રહ કોઈ મોટા બોમ્બથી ઓછો નહોતો. જો કોઈ કારણસર એક પણ સિલિન્ડરમાં બ્લાસ્ટ થયો હોત, તો આખી બસ્તી રાખ થઈ ગઈ હોત અને હજારો નિર્દોષ લોકોના જીવ જોખમમાં મુકાઈ શકત. તંત્રની સમયસૂચકતાને કારણે એક મોટી દુર્ઘટના ટળી છે.
તંત્રની કડક કાર્યવાહીના સંકેત
SDO અભય કુમારે જણાવ્યું હતું કે, આ મામલો અત્યંત ગંભીર છે અને ગેરકાયદેસર સ્ટોરેજ કરનારાઓ સામે કડક કાનૂની કાર્યવાહી કરવામાં આવશે. દરોડા દરમિયાન કોઈ અનિચ્છનીય ઘટના ન બને તે માટે ફાયર બ્રિગેડની ટીમને પણ સાથે રાખવામાં આવી હતી. હાલ તમામ સિલિન્ડર જપ્ત કરી પોલીસ સ્ટેશન ખસેડવામાં આવ્યા છે અને આ કાળાબજારના નેટવર્ક પાછળ અન્ય કોણ સામેલ છે તેની તપાસ તેજ કરવામાં આવી છે.
બિહારમાં ગેસ સિલિન્ડરની અછતનો ફાયદો ઉઠાવીને વધુ ભાવે વેચવાનું આ કૌભાંડ હવે પોલીસના રડારમાં છે.