વોશિંગ્ટન, તા. ૧૩: અમેરિકાના મિશિગન રાજ્યમાં આવેલા વેસ્ટ બ્લૂમફિલ્ડમાં એક હૃદયદ્રાવક ઘટના બની છે. ૧૨ માર્ચના રોજ એક માથાફરેલ વ્યક્તિએ પોતાનો ટ્રક જાણી જોઈને 'ટેમ્પલ ઇઝરાયેલ સિનાગોગ' (યહૂદી પ્રાર્થના સ્થળ) ના હોલવેમાં ઘુસાડી દીધો હતો. ચોંકાવનારી વાત એ છે કે જે સમયે આ હુમલો થયો, તે જ ઈમારતમાં માસૂમ બાળકો પ્રિસ્કુલમાં ભણી રહ્યા હતા. સુરક્ષા કર્મચારીઓ સાથેની અથડામણમાં શંકાસ્પદ હુમલાખોર ઠાર મરાયો છે. આ ઘટના બાદ અમેરિકામાં વસતા ભારતીય મૂળના દિગ્ગજ નેતાઓએ એકસૂરે આ નફરતભર્યા કૃત્યની નિંદા કરી છે.
ભારતીય-અમેરિકન નેતાઓમાં ભારે રોષ
કોંગ્રેસમેન રો ખન્નાએ આ હુમલાને અત્યંત "હૃદયદ્રાવક" ગણાવતા કહ્યું કે, અમેરિકામાં યહૂદી-વિરોધી માનસિકતા અને હિંસાને કોઈ સ્થાન નથી. તેમણે ભાર મૂક્યો હતો કે દરેક સમુદાયને શાંતિથી પૂજા કરવાનો અધિકાર છે. તેવી જ રીતે, કોંગ્રેસવુમન પ્રમિલા જયપાલ અને રાજા કૃષ્ણમૂર્તિએ પણ આ ઘટના પર ઘેરા આઘાતની લાગણી વ્યક્ત કરી હતી. જયપાલે જણાવ્યું હતું કે, "પૂજાના સ્થાનો હંમેશા સુરક્ષિત હોવા જોઈએ, મારી સંવેદના પીડિત પરિવારો સાથે છે."
બંધારણીય મૂલ્યો પર પ્રહાર
કોંગ્રેસમેન થાણેદારે સ્થાનિક પોલીસ અને સુરક્ષા એજન્સીઓની ત્વરિત કાર્યવાહીના વખાણ કર્યા હતા. તેમણે કહ્યું કે, ધર્મની સ્વતંત્રતા એ અમેરિકાના મૂળભૂત મૂલ્યોમાંનું એક છે અને કોઈ પણ ધર્મ વિરુદ્ધની નફરત ચલાવી લેવામાં આવશે નહીં. સાંસદ રાજા કૃષ્ણમૂર્તિએ પણ ઉમેર્યું કે આ હુમલો એક ચિંતાજનક ચેતવણી છે કે આપણે સમાજમાં ફેલાતી નફરતને જડમૂળથી ઉખેડવી પડશે.
વધતી જતી અસ્થિરતાની ચિંતા
વૈશ્વિક સ્તરે ચાલી રહેલા વિવિધ સંઘર્ષો અને તણાવ વચ્ચે ધાર્મિક નફરતની આ ઘટનાએ અમેરિકામાં સુરક્ષા વ્યવસ્થા સામે પ્રશ્નો ઉભા કર્યા છે. સિનાગોગમાંથી નીકળતા ધુમાડા અને બાળકોના જીવ જોખમમાં મૂકતી આ તસવીરોએ સોશિયલ મીડિયા પર પણ લોકોમાં ભારે આક્રોશ જન્માવ્યો છે. ભારતીય-અમેરિકન સમુદાયના આ નેતાઓનું વલણ સ્પષ્ટ કરે છે કે તેઓ અમેરિકામાં સર્વધર્મ સંભાવ અને સુરક્ષાના પક્ષમાં મજબૂત રીતે ઉભા છે.