નવી દિલ્હી : પશ્ચિમ એશિયામાં ચાલી રહેલા ભૌગોલિક-રાજકીય સંઘર્ષને કારણે ઉભી થયેલી અનિશ્ચિતતા વચ્ચે ભારત સરકારે દેશવાસીઓને મોટી રાહત આપી છે. પેટ્રોલિયમ અને કુદરતી ગેસ મંત્રાલયે શુક્રવારે સ્પષ્ટ કર્યું છે કે દેશમાં પેટ્રોલ, ડીઝલ અને એલપીજીનો પૂરતો જથ્થો ઉપલબ્ધ છે. પશ્ચિમ એશિયાની કટોકટીની ભારતની ઇંધણ સપ્લાય ચેઈન પર કોઈ અસર પડી નથી, તેથી નાગરિકોએ અફવાઓથી દોરવાઈને ગભરાટમાં ખરીદી (Panic Buying) કરવાની જરૂર નથી.
LPG ઉત્પાદનમાં તેજી અને PNG પર ભાર
પેટ્રોલિયમ મંત્રાલયના સંયુક્ત સચિવ સુજાતા શર્માએ જણાવ્યું કે, ૫ માર્ચની તુલનામાં રિફાઇનરીઓમાં એલપીજીનું ઉત્પાદન ૩૦ ટકા વધારવામાં આવ્યું છે. હોસ્પિટલો, શાળાઓ અને ઘરોને રાંધણ ગેસનો પુરવઠો પ્રાથમિકતાના ધોરણે આપવામાં આવી રહ્યો છે. તેમણે વધુમાં ઉમેર્યું કે ૧૫ મિલિયન ઘરોમાં પાઇપ્ડ નેચરલ ગેસ (PNG) સુવિધા કાર્યરત છે અને અન્ય ૬ મિલિયન ઘરો પણ આ કનેક્શન મેળવી શકે છે, જેથી સિલિન્ડર પરનું દબાણ ઘટે.
પેટ્રોલ-ડીઝલમાં ભારત ‘સુપર પાવર’
સરકારે ભારપૂર્વક કહ્યું છે કે ભારત પેટ્રોલ અને ડીઝલના ઉત્પાદનમાં સંપૂર્ણપણે ‘આત્મનિર્ભર’ છે. દેશની રિફાઇનરીઓ તેમની કુલ ક્ષમતાના ૧૦૦ ટકાથી પણ વધુ ઝડપે કામ કરી રહી છે, જેના કારણે ભારતને આ ઇંધણની આયાત કરવાની જરૂર રહેતી નથી. દેશભરના આશરે ૧,૦૦,૦૦૦ પેટ્રોલ પંપો પર સ્ટોક ફૂલ છે અને ક્યાંય પણ ‘ડ્રાય-આઉટ’ (જથ્થો ખૂટી જવો) ની સ્થિતિ નથી.
દરિયામાં ભારતીય જહાજોની સુરક્ષા
બીજી તરફ, બંદરો અને શિપિંગ મંત્રાલયના વિશેષ સચિવ રાજેશ કુમાર સિંહાએ પર્શિયન ગલ્ફમાં ફસાયેલા ભારતીય જહાજો અંગે માહિતી આપી હતી. તેમણે જણાવ્યું કે ૨૪ ભારતીય જહાજો જેમાં ૬૭૭ ખલાસીઓ છે, તે હોર્મુઝ સ્ટ્રેટની પશ્ચિમમાં છે અને સરકાર તેમના સતત સંપર્કમાં છે. જોકે, દુર્ભાગ્યવશ પ્રદેશની ગંભીર પરિસ્થિતિને કારણે ૩ ભારતીય ખલાસીઓના મોત થયા છે અને ૧ ખલાસી હજુ પણ ગુમ છે. ઘાયલ થયેલા અન્ય ૪ ખલાસીઓને સુરક્ષિત રીતે બહાર કાઢી સારવાર આપવામાં આવી રહી છે.
વૈકલ્પિક વ્યવસ્થા અને સતર્કતા
સરકારે સાવચેતીના ભાગરૂપે રાજ્યોને ૪૮,૦૦૦ કિલોલીટર વધારાનું કેરોસીન ફાળવ્યું છે અને કોલ ઇન્ડિયાને નાના ઉદ્યોગો માટે કોલસાનો પુરવઠો જાળવી રાખવા આદેશ આપ્યો છે. સરકાર દરેક હિલચાલ પર નજર રાખી રહી છે અને ખાતરી આપી છે કે દેશમાં ઉર્જા કટોકટી સર્જાવા દેવામાં આવશે નહીં.