શ્રીનગર: ઇરાન પર અમેરિકા અને ઇઝરાયેલ દ્વારા કરવામાં આવેલા હવાઈ હુમલાઓના વિરોધમાં જમ્મુ-કાશ્મીરના માગામ અને બડગામ સહિતના શિયા બહુલ વિસ્તારોમાં લોકો રસ્તા પર ઉતરી આવ્યા હતા.
રમઝાનના છેલ્લા શુક્રવારને ધ્યાનમાં રાખીને વહીવટીતંત્રે કડક નિયંત્રણો લાદી દીધા છે.
આજે શુક્રવારે જમ્મુ-કાશ્મીરના માગામ અને બડગામ સહિત કેટલાક શિયા મુસ્લિમ બહુલ વિસ્તારોમાં ઇરાન પર અમેરિકા અને ઇઝરાયેલ દ્વારા કરવામાં આવેલા સૈન્ય હુમલાઓના વિરોધમાં મોટા પાયે પ્રદર્શનો ફાટી નીકળ્યા હતા.
અધિકારીઓના જણાવ્યા અનુસાર, દેખાવકારોએ ઇરાનમાં થયેલી આક્રમક કાર્યવાહી અને પેલેસ્ટાઇનના સમર્થનમાં પ્લેકાર્ડ અને ઇરાની નેતા કાસિમ સુલેમાનીના પોસ્ટરો સાથે અમેરિકા અને ઇઝરાયેલ વિરુદ્ધ ભારે સૂત્રોચ્ચાર કર્યા હતા. 
પવિત્ર રમઝાન માસના અંતિમ શુક્રવાર (જુમા-તુલ-વિદા) ના રોજ 'યૌમ-ઉલ-કુદ્સ' મનાવવામાં આવતો હોવાથી અને બપોરની નમાજ બાદ પ્રદર્શનો ઉગ્ર બનવાની દહેશતને પગલે, સત્તાવાળાઓએ શ્રીનગર અને ખીણના અન્ય ભાગોમાં સવારે જ કડક પ્રતિબંધો અને કર્ફ્યુ જેવો માહોલ લાગુ કરી દીધો હતો. 
કાયદો અને વ્યવસ્થા જાળવી રાખવા માટે ઐતિહાસિક જામિયા મસ્જિદના દરવાજા પણ બંધ કરી દેવામાં આવ્યા હતા, જેથી ત્યાં ભીડ એકઠી ન થઈ શકે. 
કાશ્મીરના મુખ્ય ધર્મગુરુ મીરવાઇઝ ઉમર ફારૂકે નારાજગી વ્યક્ત કરતા કહ્યું હતું કે સતત સાતમા વર્ષે શાસકોએ લોકોને જામિયા મસ્જિદમાં નમાજ પઢતા રોક્યા છે. જોકે, પોલીસ પ્રશાસનનું કહેવું છે કે સ્થિતિ સંપૂર્ણપણે નિયંત્રણમાં છે