નવી દિલ્હી: નેશનલ હાઈવે પર નિયમિત મુસાફરી કરતા વાહન ચાલકો માટે માઠા સમાચાર સામે આવ્યા છે. નવા નાણાકીય વર્ષ ૨૦૨૬-૨૭ની શરૂઆત સાથે જ સરકારે નેશનલ હાઈવે પરના વાર્ષિક FASTag ટોલ પાસની ફીમાં વધારો કરવાની જાહેરાત કરી છે. નેશનલ હાઈવે ઓથોરિટી ઓફ ઈન્ડિયા (NHAI) દ્વારા લેવામાં આવેલા આ નિર્ણય મુજબ, ૧ એપ્રિલ ૨૦૨૬થી હાઈવે પર મુસાફરી કરવા માટે વાહન ચાલકોએ ખિસ્સા વધુ હળવા કરવા પડશે.
નવા દરો અને અમલીકરણ
ટોલની વ્યવસ્થા સંભાળતી સંસ્થા NHAI દ્વારા વાર્ષિક પાસની કિંમતમાં નજીવો વધારો કરવામાં આવ્યો છે. અત્યાર સુધી જે વાર્ષિક પાસ ૩૦૦૦ રૂપિયામાં મળતો હતો, તેની કિંમત હવે વધીને ૩૦૭૫ રૂપિયા કરવામાં આવી છે. આ નવી કિંમતો આગામી ૧ એપ્રિલથી સમગ્ર દેશમાં અમલી બનશે. ખાસ નોંધનીય છે કે આ પાસ માત્ર ખાનગી એટલે કે નોન-કોમર્શિયલ વાહનો માટે જ ઉપલબ્ધ હોય છે અને તેનો લાભ લેવા માટે ગાડીમાં વેલિડ FASTag હોવું અનિવાર્ય છે. સરકારના જણાવ્યા અનુસાર, ટોલના દરોની સમયાંતરે સમીક્ષા કરવામાં આવે છે અને તે આધારે જ આ ફેરફાર કરવામાં આવ્યો છે.
પાસની માન્યતાના કડક નિયમો
વાર્ષિક FASTag ટોલ પાસનો અર્થ એવો નથી કે આખું વર્ષ અમર્યાદિત વખત ટોલ પાર કરી શકાશે. આ પાસની માન્યતા અંગે ચોક્કસ નિયમો નક્કી કરવામાં આવ્યા છે:
 * આ પાસ મહત્તમ એક વર્ષના સમયગાળા માટે માન્ય રહે છે.
 * પાસ દ્વારા મુસાફર મહત્તમ ૨૦૦ વખત ટોલ ક્રોસ કરી શકે છે.
 * એક વર્ષનો સમય પૂરો થાય અથવા ૨૦૦ વખત ટોલ પાર કરવામાં આવે, આ બેમાંથી જે શરત વહેલી પૂરી થશે ત્યારે પાસની માન્યતા સમાપ્ત ગણાશે.
ઉદાહરણ તરીકે, જો કોઈ વાહન ચાલક એક વર્ષ પૂરું થવા પહેલા જ ૨૦૦ વખત ટોલ પ્લાઝા પરથી પસાર થઈ જાય, તો તેનો પાસ રદ થઈ જશે અને તેણે નવો પાસ કઢાવવો પડશે.
ટોલ પ્લાઝાને મહત્વની સૂચનાઓ
ભારતીય રાષ્ટ્રીય રાજમાર્ગ પ્રાધિકરણ દ્વારા દેશભરના તમામ ટોલ પ્લાઝા અને સંબંધિત અધિકારીઓને આ અંગે જરૂરી દિશાનિર્દેશો આપી દેવામાં આવ્યા છે. જેમાં ૧ એપ્રિલ ૨૦૨૬થી નવી કિંમતો સિસ્ટમમાં અપડેટ કરવા અને મુસાફરોને નવા દરો વિશે જાણકારી આપવા માટે સૂચના આપવામાં આવી છે. હાઈવેની જાળવણી અને સંચાલન ખર્ચને સંતુલિત કરવા માટે દર વર્ષે આ પ્રકારે ફીની સમીક્ષા કરવામાં આવતી હોય છે, જેના ભાગરૂપે આ વર્ષે વાર્ષિક પાસના દરમાં ૭૫ રૂપિયાનો વધારો જોવા મળ્યો છે.