નવી દિલ્હી :  પશ્ચિમ એશિયામાં વધતા યુદ્ધના તણાવ વચ્ચે ભારત સરકારે દેશવાસીઓને મોટી રાહત આપી છે. વિદેશ અને પેટ્રોલિયમ મંત્રાલય સહિત ચાર મંત્રાલયોએ સંયુક્ત પત્રકાર પરિષદમાં સ્પષ્ટ કર્યું કે દેશમાં ઈંધણ અને રસોઈ ગેસનો પૂરતો ભંડાર છે. ખાસ કરીને, ગેસ લઈને આવતા ભારતીય જહાજો 'શિવાલિક' અને 'નંદા દેવી' વિશ્વના સૌથી સંવેદનશીલ દરિયાઈ માર્ગ હોર્મુઝ સ્ટ્રેટમાંથી સુરક્ષિત રીતે પસાર થઈ ચૂક્યા છે અને આગામી 16-17 માર્ચ સુધીમાં ગુજરાતના મુન્દ્રા અને કંડલા બંદરે પહોંચશે.

સરકારે જણાવ્યું કે ગભરાટમાં આવીને કરવામાં આવતું LPG બુકિંગ પ્રતિદિન 7.5 મિલિયનથી વધીને 8.8 મિલિયન પર પહોંચ્યું છે, જે બિનજરૂરી છે. દિલ્હી-NCRમાં વૈકલ્પિક ઇંધણના ઉપયોગની છૂટ અને 29 રાજ્યોમાં વાણિજ્યિક સિલિન્ડરનો પુરવઠો ફરી શરૂ કરી દેવાયો છે. વહીવટીતંત્ર કાળાબજાર રોકવા માટે સખત કાર્યવાહી કરી રહ્યું છે અને વ્યવસાયિક ગ્રાહકોને PNG કનેક્શન પર સ્વિચ થવા પ્રોત્સાહિત કરવામાં આવી રહ્યા છે જેથી ઘરેલુ LPG પરનું દબાણ ઘટે.

ભારત હાલમાં અમેરિકા, ઈઝરાયેલ અને ઈરાન સાથે સતત રાજદ્વારી સંપર્કમાં છે જેથી ઉર્જા સુરક્ષા અને સપ્લાય ચેઈન ખોરવાય નહીં. ફારસી ગલ્ફમાં હાલમાં 22 ભારતીય જહાજો હાજર છે, જેની સુરક્ષા પર ભારતીય નૌકાદળ બાજ નજર રાખી રહ્યું છે. આ ઉપરાંત, ખેડૂતો માટે પૂરતા પ્રમાણમાં ખાતરનો જથ્થો ઉપલબ્ધ હોવાની પણ ખાતરી આપવામાં આવી છે, જેથી આંતરરાષ્ટ્રીય અસ્થિરતાની અસર ભારતની ખેતી કે રસોડા પર ન પડે.