ક્વિબેક: કેનેડાના ક્વિબેક પ્રાંતમાં સ્થાયી થવા માંગતા વિદેશી કામદારો માટે કેનેડા સરકાર ભેટની સોગાદ લાવી છે. ઇમિગ્રેશન વિભાગે એક વિશેષ 'કામચલાઉ માપદંડ' જાહેર કર્યો છે, જેના અંતર્ગત લાયક વિદેશી કામદારો પોતાની વર્ક પરમિટને વધુ ૧૨ મહિના સુધી લંબાવી શકશે. આ નિર્ણય ખાસ કરીને એવા લોકો માટે આશીર્વાદ સમાન છે જેઓ હાલમાં કાયમી નિવાસસ્થાન (PR) ની પ્રક્રિયામાં છે અને જેમની વર્ક પરમિટ પૂરી થવાના આરે છે.
સરકારના આ પગલાનો મુખ્ય ઉદ્દેશ્ય એ છે કે જ્યારે કોઈ કામદારની PR અરજી પ્રક્રિયા હેઠળ હોય, ત્યારે તેણે પોતાની નોકરી છોડવી ન પડે કે દેશ છોડીને જવું ન પડે. ઇન્ટરનેશનલ મોબિલિટી પ્રોગ્રામ (IMP) હેઠળ હવે આ કામદારોને 'ઝડપી' ધોરણે એમ્પ્લોયર-સ્પેસિફિક વર્ક પરમિટ આપવામાં આવશે. આનાથી એમ્પ્લોયરોને પણ રાહત થશે કારણ કે તેમના કુશળ કામદારો તેમની સાથે લાંબો સમય જોડાઈ શકશે.
કોને મળશે આ સુવિધાનો લાભ?
આ નવી નીતિનો લાભ મેળવવા માટે અમુક શરતો રાખવામાં આવી છે. જે કામદારોએ ક્વિબેકના 'નવા સ્કીલ્ડ વર્કર સિલેક્શન પ્રોગ્રામ' (PSTQ) હેઠળ અરજી કરી છે અને જેમને પ્રાંત તરફથી પસંદગીની વિનંતી મળી છે, તેઓ આ લંબાવેલી પરમિટ માટે પાત્ર ગણાશે. ખાસ કરીને જેમની વર્ક પરમિટ ૧૩ માર્ચથી ૩૧ ડિસેમ્બર, ૨૦૨૬ની વચ્ચે સમાપ્ત થઈ રહી છે, તેઓ ૩૧ ડિસેમ્બર, ૨૦૨૬ સુધી ઓનલાઇન અરજી કરી શકશે.
કેનેડા સરકારનું માનવું છે કે આ પ્રકારની લવચીક નીતિઓથી દેશની આર્થિક જરૂરિયાતો પૂરી થશે અને પ્રતિભાશાળી વિદેશી કામદારોને કેનેડાના સમાજમાં ભળવા માટે પૂરતો સમય મળશે. ક્વિબેકનું સિલેક્શન સર્ટિફિકેટ (CSQ) મેળવવાની પ્રક્રિયામાં હોય તેવા ભારતીય આઈટી પ્રોફેશનલ્સ અને અન્ય સ્કીલ્ડ વર્કર્સ માટે આ એક સુવર્ણ તક સાબિત થશે.