તેહરાન:  પશ્ચિમ એશિયામાં ભભૂકી રહેલી યુદ્ધની જ્વાળાઓ વચ્ચે ઈરાને અમેરિકા પર આકરા શબ્દપ્રહારો કરીને આંતરરાષ્ટ્રીય રાજનીતિમાં ખળભળાટ મચાવી દીધો છે. ઈરાનના વિદેશ મંત્રી અબ્બાસ અરાઘચીએ એક સનસનીખેજ નિવેદનમાં જણાવ્યું છે કે, ડોનાલ્ડ ટ્રમ્પ ભલે ખાર્ગ ટાપુનો નાશ કરવાના દાવા કરે, પરંતુ હકીકત એ છે કે માત્ર ૧૪ દિવસના સંઘર્ષમાં અમેરિકાની આર્થિક કમર તૂટી ગઈ છે. ઈરાને દાવો કર્યો છે કે હોર્મુઝની સામુદ્રધુનીમાં સર્જાયેલા અવરોધ અને તેલના પુરવઠામાં કાપને કારણે વૈશ્વિક બજારમાં ક્રૂડ ઓઈલના ભાવ પ્રતિ બેરલ $100 ને વટાવી ગયા છે, જેનાથી ગભરાયેલા વ્હાઇટ હાઉસે હવે વિશ્વભરના દેશોને રશિયા પાસેથી તેલ ખરીદવાની આજીજી કરવી પડી રહી છે. આ એ જ અમેરિકા છે જે અત્યાર સુધી ભારત જેવા દેશો પર રશિયન તેલ ન ખરીદવા દબાણ કરતું હતું.

ઈરાની વિદેશ મંત્રીએ સોશિયલ મીડિયા પ્લેટફોર્મ X પર કટાક્ષ કરતા લખ્યું કે, અમેરિકાનું આ વર્તન તેની લાચારી દર્શાવે છે. જે રશિયાને આર્થિક રીતે અલગ-થલગ કરવાના બણગા અમેરિકા ફૂંકતું હતું, આજે પોતાના દેશમાં મોંઘવારી ડામવા અને તેલ બજારને સ્થિર કરવા માટે તે જ રશિયાના તેલ પરની ૩૦ દિવસની 'સ્પેશિયલ છૂટ' જાહેર કરી રહ્યું છે. અરાઘચીએ વધુમાં ઉમેર્યું કે, યુરોપિયન દેશો જે રીતે અમેરિકાના આ "ગેરકાયદેસર યુદ્ધ" ને સમર્થન આપી રહ્યા છે તે વાહિયાત છે, કારણ કે અંતે તો રશિયા જ આ ભાવવધારાનો ફાયદો ઉઠાવી રહ્યું છે. આ સમગ્ર ઘટનાક્રમ દર્શાવે છે કે ઈરાન સાથેની દુશ્મનાવટ અમેરિકાને કેટલી મોંઘી પડી રહી છે કે તેણે પોતાના સિદ્ધાંતો નેવે મૂકીને 'દુશ્મનના દુશ્મન' પાસે મદદ માંગવી પડી છે.

બીજી તરફ, અમેરિકી ટ્રેઝરી સેક્રેટરી સ્કોટ બેસન્ટે ભારતની ભૂમિકાના વખાણ કરતા જણાવ્યું હતું કે ભારતે અત્યાર સુધી અમેરિકાની વિનંતી માનીને રશિયન તેલની ખરીદી મર્યાદિત રાખી હતી, પરંતુ હવે બજારની સ્થિતિ જોતા તેમને કામચલાઉ છૂટ આપવામાં આવી છે. જોકે, ઈરાન આને પોતાની નૈતિક અને વ્યૂહાત્મક જીત ગણાવી રહ્યું છે. તેહરાનનો આત્મવિશ્વાસ એ વાત પર ટકેલો છે કે વિશ્વની ઉર્જા સુરક્ષાની ચાવી આજે પણ તેમના ભૌગોલિક સ્થાન અને તેલના કુવાઓ પાસે છે. ખાર્ગ ટાપુ પરના હુમલા છતાં ઈરાન જે રીતે અમેરિકાને 'ભિખારી' કહીને સંબોધી રહ્યું છે, તે દર્શાવે છે કે આ યુદ્ધ હવે માત્ર હથિયારોથી નહીં પરંતુ આર્થિક અને માનસિક મોરચે પણ અત્યંત તીવ્ર બની ગયું છે.