તેહરાન (ઇરાન): મધ્ય પૂર્વમાં ઇઝરાયેલ, અમેરિકા અને ઇરાન વચ્ચે ચાલી રહેલા લોહિયાળ જંગને આજે ૧૫ દિવસ પૂરા થયા છે, ત્યારે સ્થિતિ સુધરવાને બદલે વધુ વણસી છે. ઇરાને હવે અમેરિકાને ખુલ્લી અને અત્યાર સુધીની સૌથી ગંભીર ધમકી આપીને સમગ્ર વિશ્વને સ્તબ્ધ કરી દીધું છે. ઇરાની શાસને સ્પષ્ટ શબ્દોમાં ચેતવણી આપી છે કે જો તેના તેલ માળખા પર હુમલા ચાલુ રહેશે, તો તે મધ્ય પૂર્વમાં રહેલી અમેરિકન તેલ અને ઉર્જા સુવિધાઓને માત્ર થોડી જ મિનિટોમાં "રાખના ઢગલા" માં ફેરવી દેશે.
લગભગ બે અઠવાડિયા પહેલા શરૂ થયેલું આ યુદ્ધ હવે માત્ર સરહદો પૂરતું મર્યાદિત રહ્યું નથી, પરંતુ તે વૈશ્વિક તેલ સંકટનું મુખ્ય કારણ બની ગયું છે. ઇરાનની આ ધમકી એવા સમયે આવી છે જ્યારે દુનિયાભરના અનેક દેશો ગંભીર ઉર્જા સંકટનો સામનો કરી રહ્યા છે અને તેલના ભાવ આસમાને પહોંચી રહ્યા છે.
મોજતબા ખામેનીની પ્રતિજ્ઞા: બદલો લેવાશે અને હોર્મુઝ બંધ રહેશે
ઇરાનના નવા સુપ્રીમ લીડર મોજતબા ખામેનીએ એક દિવસ પહેલા જારી કરેલા આક્રમક નિવેદનમાં સ્પષ્ટ કર્યું છે કે, તેઓ તેમના પિતા સૈયદ આયાતુલ્લાહ અલી ખામેનીની શહાદતનો બદલો લઈને જ જંપશે. તેમણે જાહેરાત કરી છે કે વિશ્વના સૌથી મહત્વપૂર્ણ દરિયાઈ માર્ગ, 'હોર્મુઝ સ્ટ્રેટ' (Strait of Hormuz) ની નાકાબંધી ચાલુ રહેશે. ઇરાની અધિકારીઓના જણાવ્યા અનુસાર, આ નાકાબંધી અને પ્રાદેશિક હુમલાઓને કારણે વિશ્વના પાંચમા ભાગથી વધુ તેલ વેપાર સંપૂર્ણપણે ઠપ થઈ ગયો છે.
ભારત સહિત વૈશ્વિક અર્થતંત્ર પર ખતરો
આંતરરાષ્ટ્રીય બજારમાં ક્રૂડ ઓઈલના ભાવ અત્યારે રેકોર્ડ સ્તરે પહોંચી ગયા છે. સંરક્ષણ અને આર્થિક વિશ્લેષકો માને છે કે જો પરિસ્થિતિ વધુ વણસે છે અને ઇરાન તેની ધમકી મુજબ અમેરિકન તેલ સુવિધાઓ પર હુમલો કરે છે, તો તેની વૈશ્વિક અર્થતંત્ર પર ઊંડી અને કલ્પના બહારની માઠી અસર પડી શકે છે. ભારત જેવા મોટા તેલ આયાતકાર દેશો આ કટોકટીમાં સૌથી ખરાબ રીતે પ્રભાવિત થઈ શકે છે, જેનાથી દેશમાં મોંઘવારીનો નવો આંક આસમાને પહોંચી શકે છે.