ઈરાન: મધ્ય પૂર્વમાં ભડકેલા યુદ્ધને શાંત કરવાના વૈશ્વિક પ્રયાસોને મોટો ઝટકો લાગ્યો છે. અમેરિકી રાષ્ટ્રપતિ ડોનાલ્ડ ટ્રમ્પે સ્પષ્ટ શબ્દોમાં જણાવી દીધું છે કે ઈરાન સાથે હાલમાં કોઈ પણ પ્રકારની રાજદ્વારી વાટાઘાટો કે યુદ્ધવિરામની શક્યતા નથી. વ્હાઇટ હાઉસના સૂત્રોના જણાવ્યા અનુસાર, ટ્રમ્પ વહીવટીતંત્રની હાલની એકમાત્ર પ્રાથમિકતા ઈરાનની લશ્કરી ક્ષમતાઓને સંપૂર્ણપણે નબળી પાડવાની છે. ઓમાન અને ઈજિપ્ત જેવા દેશો દ્વારા કરવામાં આવેલા મધ્યસ્થીના તમામ પ્રયાસોને અમેરિકાએ નકારી કાઢ્યા છે, જેનાથી સ્પષ્ટ થાય છે કે આ સંઘર્ષ લાંબા સમય સુધી ખેંચાઈ શકે છે.

ઈરાનનું વલણ પણ એટલું જ આક્રમક છે. તેહરાને પણ યુદ્ધવિરામ માટેની શરતો મૂકતા સ્પષ્ટ કર્યું છે કે જ્યાં સુધી અમેરિકા અને ઈઝરાયેલ હુમલા બંધ કરીને કાયમી શાંતિની ગેરંટી ન આપે અને યુદ્ધથી થયેલા નુકસાનનું વળતર ન આપે ત્યાં સુધી કોઈ વાટાઘાટો શક્ય નથી. ઈસ્લામિક રિવોલ્યુશનરી ગાર્ડ કોર્પ્સ (IRGC) નું માનવું છે કે હોર્મુઝની સામુદ્રધુની પરનો તેમનો કાબૂ જ તેમની સૌથી મોટી તાકાત છે, અને કોઈપણ પ્રકારનું સમાધાન તેમની સ્થિતિને નબળી પાડી શકે છે. આ બેધારી અડચણોને કારણે શાંતિ સ્થાપવા માટેના તમામ રાજદ્વારી દરવાજા હાલ પૂરતા બંધ જણાય છે.
આ સંઘર્ષના વણસતા સ્વરૂપને કારણે વૈશ્વિક બજારોમાં પણ ચિંતાનું મોજું ફરી વળ્યું છે. યુદ્ધની લંબાઈ અને હોર્મુઝ સ્ટ્રેટમાં વધતા તણાવને પગલે ક્રૂડ ઓઈલના ભાવમાં મોટો ઉછાળો આવવાની દહેશત સેવાઈ રહી છે. અમેરિકી વહીવટીતંત્રના વરિષ્ઠ અધિકારીઓએ પુષ્ટિ કરી છે કે, અત્યારે તો માત્ર સૈન્ય અભિયાનને ગતિ આપવાની રણનીતિ છે, અને ભવિષ્યમાં પરિસ્થિતિ બદલાય તો જ વાટાઘાટોનો વિચાર કરવામાં આવશે. આવી સ્થિતિમાં, યુદ્ધના મેદાનમાં વધતી જતી નાગરિક જાનહાનિ અને આર્થિક અનિશ્ચિતતા વચ્ચે મધ્ય પૂર્વની આગ ઠરવાનું નામ નથી લઈ રહી.