નવી દિલ્હી: પશ્ચિમ એશિયામાં યુદ્ધના તોળાઈ રહેલા કાળા વાદળો અને અચાનક વણસેલી પરિસ્થિતિ વચ્ચે ઈરાનમાં ફસાયેલા ૭૦ જેટલા ભારતીય વિદ્યાર્થીઓ અને યાત્રાળુઓ આખરે હેમખેમ વતન પરત ફર્યા છે. રવિવારે સવારે જ્યારે ઈન્દિરા ગાંધી આંતરરાષ્ટ્રીય વિમાનમથક પર ફ્લાયદુબઈની ફ્લાઇટ ઉતરી, ત્યારે લાંબી અનિશ્ચિતતા અને ભયના ઓથાર હેઠળ જીવતા આ યુવાનોના ચહેરા પર સ્મિત અને આંખોમાં રાહત સ્પષ્ટ દેખાતી હતી. જમ્મુ અને કાશ્મીરના આ વિદ્યાર્થીઓ ઈરાનની વિવિધ યુનિવર્સિટીઓમાં અભ્યાસ કરી રહ્યા હતા, પરંતુ યુદ્ધના ભણકારા વાગતા જ તેમના પરિવારોમાં ફફડાટ વ્યાપી ગયો હતો. આ મુશ્કેલ સમયમાં વિદ્યાર્થીઓના સુરક્ષિત પરત ફરવાને ભારતીય રાજદ્વારી સફળતા તરીકે જોવામાં આવી રહી છે.

આ રેસ્ક્યુ મિશન પાછળની મુસાફરી અત્યંત પડકારજનક રહી હતી. જમ્મુ અને કાશ્મીર વિદ્યાર્થી સંગઠન (JKSA) ના સહયોગથી અને ભારતીય દૂતાવાસની સક્રિય ભૂમિકાને કારણે, આ મુસાફરોને આર્મેનિયાની રાજધાની યેરેવનથી દુબઈ અને ત્યારબાદ દિલ્હી લાવવા માટે એક જટિલ રૂટ પસંદ કરવો પડ્યો હતો. ફ્લાયદુબઈની ફ્લાઇટ દ્વારા આ સુરક્ષિત કોરિડોર બનાવવામાં આવ્યો હતો. દિલ્હી એરપોર્ટ પર પગ મુકતા જ વિદ્યાર્થીઓએ જણાવ્યું હતું કે છેલ્લા કેટલાય દિવસોથી તેઓ સતત ભય અને તણાવમાં હતા, પરંતુ આજે માતૃભૂમિની ધરતી પર પગ મુકતા જ તેમને ખરા અર્થમાં નવી જિંદગી મળી હોય તેવી અનુભૂતિ થઈ રહી છે.

આ વિદ્યાર્થીઓની વાપસીથી તેમના પરિવારોમાં તો રાહતની લાગણી પ્રસરી છે, પરંતુ હજુ પણ ઈરાનના અલગ-અલગ વિસ્તારોમાં ઘણા ભારતીયો અટવાયેલા છે. ભારત સરકાર આ સ્થિતિ પર સતત બાજ નજર રાખી રહી છે અને ઈરાનમાં રહેલા ભારતીય નાગરિકોની સુરક્ષા માટે ઈમરજન્સી પ્લાન તૈયાર રાખવામાં આવ્યો છે. વિદેશ મંત્રાલય દ્વારા જરૂર પડ્યે અન્ય નાગરિકોને પણ તબક્કાવાર બહાર કાઢવાની કામગીરી ચાલુ રાખવાની ખાતરી આપવામાં આવી છે. આ સફળ ઓપરેશને ફરી એકવાર સાબિત કર્યું છે કે દુનિયાના ગમે તે ખૂણે સંકટમાં ફસાયેલા ભારતીય નાગરિકોને સુરક્ષિત ઘરે લાવવા ભારત સરકાર કટિબદ્ધ છે.