લોસ એન્જલસ:વિશ્વભરના સિનેમા પ્રેમીઓ જેની આતુરતાથી રાહ જોઈ રહ્યા છે તેવા 98માં એકેડેમી એવોર્ડ્સ એટલે કે ઓસ્કાર 2026નું રવિવારે રાત્રે અમેરિકાના લોસ એન્જલસ સ્થિત ડોલ્બી થિયેટર ખાતે આયોજન કરવામાં આવ્યું છે. ભારતીય સમય અને તારીખ મુજબ આ ભવ્ય સમારોહ સોમવાર, 16 માર્ચ 2026 ના રોજ વહેલી સવારે 4:30 વાગ્યે પ્રસારિત થશે. આ વર્ષે હોલીવુડના દિગ્ગજ કલાકારો અને ફિલ્મો વચ્ચે એવોર્ડ મેળવવા માટે અભૂતપૂર્વ સ્પર્ધા જોવા મળી રહી છે.
બે દિગ્ગજ ફિલ્મો વચ્ચેની ટક્કર
આ વર્ષે મુખ્ય સ્પર્ધા લિયોનાર્ડો ડિકાપ્રિયોની ફિલ્મ 'વન બેટલ આફ્ટર અનધર' અને રાયન કુગલરની 'સિનર્સ' વચ્ચે છે. 'વન બેટલ આફ્ટર અનધર' એ અત્યાર સુધીના લગભગ તમામ મોટા એવોર્ડ જીત્યા છે અને તેને 13 નોમિનેશન મળ્યા છે. જોકે, 16 નોમિનેશન સાથે રેકોર્ડ સર્જનાર રાયન કુગલરની વેમ્પાયર હોરર ફિલ્મ 'સિનર્સ' એ તાજેતરમાં એક્ટર એવોર્ડ્સમાં જીત મેળવીને સૌને ચોંકાવી દીધા છે, જેના કારણે શ્રેષ્ઠ ફિલ્મની રેસ રોમાંચક બની છે.
અભિનય ક્ષેત્રે રસાકસી
શ્રેષ્ઠ અભિનેત્રીની કેટેગરીમાં 'હેમનેટ' ફિલ્મમાં શેક્સપિયરની પત્નીની ભૂમિકા માટે જેસી બકલી સૌથી આગળ માનવામાં આવે છે. જ્યારે શ્રેષ્ઠ અભિનેતા માટે યુવા સ્ટાર ટિમોથી ચાલેમેટ અને માઈકલ બી. જોર્ડન વચ્ચે કાંટાની ટક્કર છે. માઈકલ બી. જોર્ડને તાજેતરમાં સ્ક્રીન એક્ટર્સ ગિલ્ડ એવોર્ડ જીતીને પોતાની દાવેદારી મજબૂત કરી છે, જ્યારે ચાલેમેટ એકેડેમીના યુવા કલાકારો પ્રત્યેના પૂર્વગ્રહને તોડવાનો પ્રયાસ કરશે.
સમારોહના મુખ્ય આકર્ષણો
લોકપ્રિય કોમેડિયન કોનન ઓ'બ્રાયન સતત બીજા વર્ષે ઓસ્કારના હોસ્ટ તરીકે સ્ટેજ પર પરત ફરી રહ્યા છે. આ વર્ષે એકેડેમી દ્વારા સિનેમાના ઈતિહાસમાં પ્રથમ વખત 'બેસ્ટ કાસ્ટિંગ' માટે નવો એવોર્ડ એનાયત કરવામાં આવશે. મનોરંજનના મોરચે, 'કે-પોપ ડેમન હન્ટર્સ' દ્વારા તેમનું લોકપ્રિય ગીત 'ગોલ્ડન' લાઈવ સ્ટેજ પર પર્ફોર્મ કરવામાં આવશે.
ક્યાં અને ક્યારે જોવો સમારોહ?
ભારતીય દર્શકો માટે આ શો સોમવારે (16 માર્ચ) વહેલી સવારે 4:30 વાગ્યે શરૂ થશે. અમેરિકામાં તે રવિવારે (15 માર્ચ) સાંજે 7 વાગ્યે (EST) શરૂ થશે. ટીવી સિવાય આ એવોર્ડ શોનું લાઈવ સ્ટ્રીમિંગ 'હુલુ' (Hulu) પ્લેટફોર્મ પર ઉપલબ્ધ રહેશે. આ વર્ષે પણ એકેડેમીએ વહેલી શરૂઆતની પરંપરા જાળવી રાખી છે જેથી વિશ્વભરના દર્શકો આ ગ્લોબલ ઇવેન્ટનો આનંદ માણી શકે.