કોલકાતા :  પશ્ચિમ બંગાળની રાજકીય પિચ પર ફરી એકવાર 'દીદી વિરુદ્ધ દાદા'નો રોમાંચક મુકાબલો જામવાનો છે. ભારતીય જનતા પાર્ટીએ ૧૪૪ ઉમેદવારોની પ્રથમ યાદી જાહેર કરીને સ્પષ્ટ કરી દીધું છે કે તેઓ આ વખતે કોઈ પણ ભોગે તૃણમૂલ કોંગ્રેસને તેમના ગઢમાં જ પછાડવા માંગે છે. સૌથી વધુ ચર્ચા સુવેન્દુ અધિકારીની ઉમેદવારીની છે, જેમને ભાજપે મમતા બેનર્જીના મતવિસ્તાર ભવાનીપુર અને નંદીગ્રામ બંને મોરચે સક્રિય કર્યા છે. ગત ચૂંટણીમાં નંદીગ્રામમાં મમતા બેનર્જીને પરાજય આપનાર સુવેન્દુ ફરી એકવાર 'જાયન્ટ કિલર' સાબિત થશે કે કેમ, તે જોવું રસપ્રદ રહેશે. ભાજપની આ યાદીમાં દિલીપ ઘોષ અને અગ્નિમિત્રા પોલ જેવા દિગ્ગજ ચહેરાઓને સ્થાન આપીને પાર્ટીએ બંગાળમાં સત્તા પરિવર્તનનો મજબૂત દાવો રજૂ કર્યો છે.

ચૂંટણી પંચે આ વખતે બંગાળની જટિલ ચૂંટણી પ્રક્રિયાને માત્ર બે જ તબક્કામાં (૨૩ અને ૨૯ એપ્રિલ) સમેટી લેવાનો ઐતિહાસિક નિર્ણય લીધો છે, જે રાજકીય પક્ષો માટે વ્યૂહરચના બદલવાનું કારણ બન્યું છે. મુખ્ય ચૂંટણી કમિશનર જ્ઞાનેશ કુમારે પ્રક્રિયાને સરળ બનાવવાની વાત કરી છે, પરંતુ જમીની સ્તરે માહોલ અત્યંત ગરમ છે. ૨૦૨૧ માં ટીએમસીએ ૨૧૫ બેઠકો સાથે ભવ્ય વિજય મેળવ્યો હતો, પરંતુ ભાજપે ૭૭ બેઠકો સાથે મુખ્ય વિપક્ષ તરીકે પોતાની તાકાત બતાવી હતી. આ વખતે ભાજપ શિસ્તબદ્ધ સંગઠન અને ફાયરબ્રાન્ડ નેતાઓના જોરે મમતા બેનર્જીના વિજય રથને રોકવા માટે એડીચોટીનું જોર લગાવી રહી છે.

આગામી ૪ મેના રોજ જ્યારે પરિણામો જાહેર થશે, ત્યારે માત્ર બંગાળ જ નહીં પરંતુ સમગ્ર ભારતની નજર આ પાંચ રાજ્યોના ફેંસલા પર હશે. ભવાનીપુર બેઠક કે જે મમતા બેનર્જી માટે સલામત માનવામાં આવે છે, ત્યાં સુવેન્દુ અધિકારીની એન્ટ્રીએ લડાઈને વ્યક્તિગત અને પ્રતિષ્ઠાનો જંગ બનાવી દીધી છે. ભાજપની આક્રમક રણનીતિ સામે ટીએમસી હવે કેવો પલટવાર કરે છે અને બંગાળી જનતા કોના 'ખેલા' પર મહોર મારે છે, તે જોવાનું બાકી છે. શું મમતા બેનર્જી પોતાની સત્તા જાળવી રાખશે કે પછી ભાજપ બંગાળમાં નવો ઇતિહાસ લખશે, તે પ્રશ્ન અત્યારે કોલકાતાની ગલીઓથી લઈને દિલ્હીના દરબાર સુધી ગાજી રહ્યો છે.