નવી દિલ્હી : મધ્ય પૂર્વમાં ઇઝરાયલ, અમેરિકા અને ઈરાન વચ્ચે ફાટી નીકળેલા યુદ્ધની આંચ હવે ભારતીય આકાશ સુધી પહોંચી છે. ઈરાન અને ઈરાકનું હવાઈ ક્ષેત્ર (Airspace) વ્યાપારી ફ્લાઇટ્સ માટે બંધ કરી દેવામાં આવતા એર ઇન્ડિયાની આંતરરાષ્ટ્રીય ઉડાનના રૂટ લાંબા થઈ ગયા છે. આ કટોકટીને પહોંચી વળવા માટે નાગરિક ઉડ્ડયન મહાનિર્દેશાલય (DGCA) એ એક મોટો નિર્ણય લેતા એર ઇન્ડિયાના પાઇલટો માટે ફ્લાઇટ ડ્યુટીના કલાકોમાં કામચલાઉ વધારો કરવાની મંજૂરી આપી દીધી છે.
શા માટે લેવાયો આ નિર્ણય?
૨૮ ફેબ્રુઆરીથી ઈરાની અને ઇરાકી હવાઈ ક્ષેત્ર બંધ હોવાને કારણે એર ઇન્ડિયાની લાંબા અંતરની ફ્લાઇટ્સને વૈકલ્પિક અને લાંબા રસ્તેથી ઉડાડવાની ફરજ પડી રહી છે. આના કારણે વિમાનના ઉડ્ડયન સમયમાં નોંધપાત્ર વધારો થયો છે. મુસાફરોને પડતી મુશ્કેલી અને ફ્લાઇટના શેડ્યૂલમાં થતા વિલંબને રોકવા માટે DGCA એ ફ્લાઇટ ડ્યુટી સમય મર્યાદા (FDTL) ના નિયમોમાં ઢીલ આપી છે.
કામના કલાકોમાં કેટલો વધારો થયો?
નવા આદેશ મુજબ, બે પાઇલટ ધરાવતી ફ્લાઇટ માટે મહત્તમ 'ઉડાન સમય' ૧ કલાક ૩૦ મિનિટ વધારીને ૧૧ કલાક ૩૦ મિનિટ કરવામાં આવ્યો છે. જ્યારે પાઇલટની કુલ 'ડ્યુટીનો સમયગાળો' (જેમાં તૈયારી અને લેન્ડિંગ પછીની પ્રક્રિયાનો પણ સમાવેશ થાય છે) ૧ કલાક ૪૫ મિનિટ વધારીને ૧૪ કલાક ૪૫ મિનિટ કરવામાં આવ્યો છે. આ ઉપરાંત, ૩૦ મિનિટના રોસ્ટર પ્લાનિંગ બફરની અનિવાર્યતામાંથી પણ મુક્તિ આપવામાં આવી છે.
પાઇલટોમાં ચિંતા અને સુરક્ષાના પગલાં
જોકે, ફેડરેશન ઓફ ઇન્ડિયન પાઇલટ્સ (FIP) એ આ નિર્ણય સામે ચિંતા વ્યક્ત કરી છે. તેમનું માનવું છે કે લાંબા કલાકો સુધી વિમાન ઉડાડવાથી પાઇલટોમાં થાક વધી શકે છે, જે સુરક્ષા માટે જોખમી બની શકે. બીજી તરફ, એર ઇન્ડિયાના અધિકારીઓએ ખાતરી આપી છે કે જે પાઇલટો વધુ સમય ફરજ બજાવશે તેમને વધારાનો '૪ કલાકનો આરામ' આપવામાં આવશે અને નિયમનકાર દ્વારા સતત દેખરેખ રાખવામાં આવશે. હાલમાં આ મુક્તિ માત્ર ચોક્કસ આંતરરાષ્ટ્રીય રૂટ્સ માટે જ લાગુ કરવામાં આવી છે.