નવી દિલ્હી : કેન્દ્રીય મંત્રી હરદીપ સિંહ પુરીની પુત્રી હિમાયાની પુરીએ સોશિયલ મીડિયા પર પોતાની છબી ખરડવાના પ્રયાસો સામે લાલ આંખ કરી છે. તેમણે દિલ્હી હાઈકોર્ટમાં ₹૧૦ કરોડનો માનહાનિનો દાવો દાખલ કર્યો છે. આ દાવો સોશિયલ મીડિયા પર વાયરલ થઈ રહેલા એવા અહેવાલો અને વીડિયોને દૂર કરવા માટે છે, જેમાં તેમનું નામ કુખ્યાત અમેરિકન બાળ જાતીય ગુનેગાર જેફરી એપ્સ્ટેઇન સાથે જોડવામાં આવ્યું છે.
શું છે સમગ્ર વિવાદ?
હિમાયાની પુરીના જણાવ્યા અનુસાર, ૨૨ ફેબ્રુઆરી ૨૦૨૬થી વિવિધ સોશિયલ મીડિયા પ્લેટફોર્મ્સ પર પાયાવિહોણા આરોપો લગાવવામાં આવી રહ્યા છે. આ પોસ્ટ્સમાં દાવો કરવામાં આવ્યો હતો કે તેઓ જેફરી એપ્સ્ટેઇન અને તેની ગુનાહિત પ્રવૃત્તિઓ સાથે પ્રત્યક્ષ કે પરોક્ષ રીતે નાણાકીય કે વ્યક્તિગત જોડાણ ધરાવે છે. વધુમાં, તેમની ભૂતપૂર્વ કંપની 'રીઅલ પાર્ટનર્સ LLC' ને પણ એપ્સ્ટેઇન પાસેથી ભંડોળ મળ્યું હોવાના ખોટા આરોપો લગાવવામાં આવ્યા હતા.
તથ્યો સાથે છેડછાડનો આરોપ
હિમાયાની પુરીએ કોર્ટમાં દલીલ કરી છે કે આ તમામ આરોપો સનસનાટી ફેલાવવા માટે સોશિયલ મીડિયા પર એડિટ કરેલા વીડિયો, ભ્રામક કેપ્શન્સ અને નકલી થંબનેલ્સ દ્વારા વાયરલ કરવામાં આવ્યા છે. તેમણે સ્પષ્ટપણે જણાવ્યું છે કે, "આ આક્રમણ માત્ર એટલા માટે થઈ રહ્યું છે કારણ કે હું કેન્દ્રીય મંત્રીમંડળના વરિષ્ઠ સભ્ય હરદીપ સિંહ પુરીની પુત્રી છું. આ એક આત્મનિર્ભર વ્યાવસાયિક મહિલા પર કરવામાં આવેલો ક્રૂર હુમલો છે."
સોશિયલ મીડિયા કંપનીઓને નિર્દેશની માંગ
સિનિયર એડવોકેટ મહેશ જેઠમલાણી મારફતે દાખલ કરાયેલા આ દાવામાં Google, Meta (Facebook/Instagram), X (Twitter) અને LinkedIn જેવી કંપનીઓને પક્ષકાર બનાવવામાં આવ્યા છે. હાઈકોર્ટ પાસે માંગ કરવામાં આવી છે કે આ પ્લેટફોર્મ્સને વાંધાજનક સામગ્રી તાત્કાલિક હટાવવા માટે આદેશ આપવામાં આવે. આ કેસની સુનાવણી આવતીકાલે મંગળવારે થવાની સંભાવના છે, જેના પર સમગ્ર રાજકીય અને કાયદાકીય વર્તુળોની નજર રહેશે.