પટના: દેશના ૧૦ રાજ્યોની ૩૭ રાજ્યસભા બેઠકો માટે યોજાયેલી દ્વિવાર્ષિક ચૂંટણીમાં આજે ભારતીય જનતા પાર્ટી (BJP) અને તેના સહયોગી પક્ષો (NDA) એ શાનદાર પ્રદર્શન કર્યું છે. સૌથી વધુ રસાકસી બિહાર, ઓડિશા અને હરિયાણામાં જોવા મળી હતી. બિહારમાં વિપક્ષના તમામ ગણિતોને હંફાવીને NDA એ પાંચેય બેઠકો પર જીત મેળવી છે, જ્યારે ઓડિશામાં સત્તાધારી ભાજપે મુખ્યમંત્રી મોહન ચરણ માઝીના નેતૃત્વમાં શાનદાર સફળતા હાંસલ કરી છે.
બિહારમાં NDAનો 'પંચ'
બિહારમાં રાજ્યસભાની ૫ બેઠકો માટે ભારે રસાકસી હતી. સત્તાધારી પક્ષો તરફથી મુખ્યમંત્રી નીતિશ કુમાર અને નીતિન નવીન જેવા દિગ્ગજો મેદાનમાં હતા. છેલ્લી ઘડીએ વિપક્ષી નેતા તેજસ્વી યાદવે 'ક્રોસ વોટિંગ'ની આશાએ જંગ રસપ્રદ બનાવ્યો હતો, પરંતુ આખરે પાંચેય બેઠકો NDA ના ફાળે ગઈ છે. બિહારના મંત્રી રામકૃપાલ યાદવે આ જીતને વિકાસની જીત ગણાવીને આગામી ચૂંટણીઓ માટે પણ આત્મવિશ્વાસ વ્યક્ત કર્યો છે. જોકે, RJD નેતા તેજસ્વી યાદવે મતગણતરીમાં ગેરરીતિ અને ભાજપના દબાણના આક્ષેપો કર્યા હતા.
ઓડિશામાં નવીન પટનાયકને ઝટકો
ઓડિશામાં ૪ બેઠકો માટેની ચૂંટણીમાં ભાજપે ૩ બેઠકો જીતીને પોતાની શક્તિ બતાવી છે. ભાજપના ઉમેદવાર મનમોહન સામલ અને સુજિત કુમાર વિજયી થયા છે, જ્યારે ભાજપ સમર્થિત અપક્ષ ઉમેદવાર દિલીપ રાયે પણ બાજી મારી છે. પૂર્વ મુખ્યમંત્રી નવીન પટનાયકની પાર્ટી BJD ના ફાળે માત્ર ૧ બેઠક આવી છે, જેના પર સંતૃપ્ત મિશ્રા ચૂંટાઈ આવ્યા છે. ચૂંટણી દરમિયાન બંને પક્ષોના ધારાસભ્યો વચ્ચે ઝપાઝપીના દ્રશ્યો પણ જોવા મળ્યા હતા, જે જંગની તીવ્રતા દર્શાવે છે.
હરિયાણામાં પેચ ફસાયો, તામિલનાડુ-મહારાષ્ટ્રમાં બિનહરીફ
હરિયાણાની ૨ બેઠકો માટેની મતગણતરી મોડી સાંજે અટકાવી દેવામાં આવી હતી. કોંગ્રેસ અને ભાજપ બંનેએ એકબીજાના મતો સામે વાંધો ઉઠાવતા ચૂંટણી પંચ દ્વારા તપાસ હાથ ધરવામાં આવી છે. બીજી તરફ, મહારાષ્ટ્ર, તામિલનાડુ અને પશ્ચિમ બંગાળ સહિતના અન્ય રાજ્યોમાં ૨૬ ઉમેદવારો પહેલેથી જ બિનહરીફ ચૂંટાઈ આવ્યા હતા. તામિલનાડુમાં ડીએમકેના તિરુચી શિવા અને એઆઈએડીએમકેના થમ્બી દુરાઈ જેવા વરિષ્ઠ નેતાઓએ બિનહરીફ વિજય મેળવ્યો છે.
આ ચૂંટણી પરિણામો સાથે જ ઉચ્ચ સદનમાં સત્તાધારી પક્ષ અને વિપક્ષના સંખ્યાબળમાં મોટા ફેરફારો જોવા મળશે, જેની અસર આગામી સંસદીય સત્રો પર પણ પડશે.