દુબઈ  :  મધ્ય પૂર્વમાં ઇઝરાયેલ-અમેરિકા અને ઈરાન વચ્ચેના જંગમાં સંયુક્ત આરબ અમીરાત (UAE) અત્યારે સૌથી કપરી પરિસ્થિતિમાં મુકાયું છે. ૨૮ ફેબ્રુઆરીથી શરૂ થયેલા સંઘર્ષ બાદ ઈરાને UAE પર ૧,૬૦૦ થી વધુ ડ્રોન અને ૩૦૦ જેટલી બેલિસ્ટિક મિસાઈલોનો વરસાદ કર્યો છે. જોકે, આ આકાશી આફતને રોકવા માટે UAE એ અબજો ડોલરની કિંમતના ઇન્ટરસેપ્ટર્સ વાપરવા પડ્યા છે. તેમ છતાં, કેટલાક ઘાતક ડ્રોન રહેણાંક વિસ્તારો અને નાગરિકોના લક્ષ્યો પર ત્રાટકતા છ નિર્દોષ લોકોએ જીવ ગુમાવ્યા છે. આટલા મોટા પાયે જાન-માલનું નુકસાન વેઠ્યા પછી પણ UAE એ ઈરાન પર વળતો પ્રહાર કર્યો નથી, જે વૈશ્વિક રાજકારણમાં ચર્ચાનો વિષય બન્યો છે.

આ સંયમ પાછળનું મુખ્ય કારણ UAE નું નાજુક અને પ્રવાસન પર ટકેલું અર્થતંત્ર છે. દુબઈ ઇન્ટરનેશનલ એરપોર્ટ પર ફ્લાઇટ્સ બંધ થતા અમીરાત એરલાઇન્સને રોજના અંદાજે $૧૦૦ મિલિયનનું નુકસાન થઈ રહ્યું છે, જ્યારે જેબેલ અલી બંદર પર વેપાર ઠપ થવાથી દરરોજ $૫૦૦ મિલિયન (આશરે ₹૪,૬૦૦ કરોડ) ધૂળમાં મળી રહ્યા છે. UAE સારી રીતે જાણે છે કે જો તે ઈરાન સામે સીધા યુદ્ધમાં ઉતરશે, તો આધુનિક દુબઈ અને અબુ ધાબીની ચમક ક્ષણવારમાં રોળાઈ શકે છે. જો હોર્મુઝ સ્ટ્રેટ કાયમી ધોરણે બંધ થઈ જાય, તો UAE નો તેલ વેપાર અને સપ્લાય ચેઈન સંપૂર્ણપણે ભાંગી પડે તેમ છે, જે કોઈ પણ ભોગે પોસાય તેમ નથી.

વ્યૂહાત્મક રીતે જોઈએ તો, UAE ની 'મજબૂરી' એ છે કે તે એક વૈશ્વિક બિઝનેસ હબ છે. યુદ્ધ લાંબુ ખેંચાય તો વિદેશી રોકાણકારો અને પ્રવાસીઓ ગલ્ફ દેશોથી મોઢું ફેરવી લેશે. આથી, બદલો લેવાને બદલે UAE અત્યારે પોતાની સંરક્ષણ પ્રણાલી મજબૂત કરવા અને રાજદ્વારી રીતે ઉકેલ લાવવા પર ભાર મૂકી રહ્યું છે. નેપાળી અને બાંગ્લાદેશી શ્રમિકોના મોત છતાં, અમીરાત તેના અર્થતંત્રને વધુ જોખમમાં નાખવા તૈયાર નથી. હાલમાં તો UAE "વેપાર પહેલા અને યુદ્ધ છેલ્લે" ની નીતિ પર ચાલી રહ્યું છે, જેથી તેનું ભવિષ્ય સુરક્ષિત રહે.