બગદાદ તા.૧૭: ઇરાકની રાજધાની બગદાદમાં યુએસ દૂતાવાસ પર ડ્રોન અને રોકેટથી હુમલો કરવામાં આવ્‍યો છે. હુમલાના લગભગ છ કલાક પહેલા, દૂતાવાસે ઇરાકમાં રહેતા અમેરિકી નાગરિકો માટે સુરક્ષા ચેતવણી જારી કરી હતી.

દરમિયાન, ઇઝરાયલે ઇરાનની રાજધાની તેહરાનમાં મોટા પાયે હવાઈ હુમલો કરવાનો દાવો કર્યો છે. મીડિયા રિપોર્ટ્‍સ અનુસાર, તેહરાનના ઉત્તર ભાગમાં ઘણા મોટા વિસ્‍ફોટો સાંભળવામાં આવ્‍યા હતા.

આ તણાવ વચ્‍ચે, ભારત માટે રાહતના સમાચાર છે. આજે બે ભારતીય જહાજો ગુજરાતના કંડલા બંદર અને મુન્‍દ્રા બંદર પર પહોંચવાના છે. નંદા દેવી જહાજ આશરે ૪૬,૦૦૦ મેટ્રિક ટન LPG લઈને કંડલા પહોંચશે, જ્‍યારે જગ લડકી જહાજ આશરે ૮૧,૦૦૦ ટન ક્રૂડ ઓઇલ લઈને મુન્‍દ્રા બંદર પર પહોંચશે. બંને જહાજો હોર્મુઝ સ્‍ટ્રેટથી ભારત તેલ અને ગેસ લઈ જઈ રહ્યા છે.

અગાઉ, ભારતીય જહાજ શિવાલિક સોમવારે LPG લઈને મુન્‍દ્રા બંદર પર પહોંચ્‍યું હતું. આ જહાજ આશરે ૪૬,૦૦૦ મેટ્રિક ટન LPG વહન કરે છે, જે આશરે ૩.૨૪ મિલિયન ઘરેલુ ગેસ સિલિન્‍ડરની સમકક્ષ છે.