નવી દિલ્હી: દેશની સંસદના પરિસરમાં તાજેતરમાં થયેલા વિરોધ પ્રદર્શનને લઈને રાજકીય ગરમાવો તેજ બન્યો છે. લોકસભામાં વિપક્ષના નેતા રાહુલ ગાંધીના નેતૃત્વમાં થયેલા આ પ્રદર્શન સામે હવે દેશના નિવૃત્ત વહીવટી અને સૈન્ય અધિકારીઓએ મોરચો માંડ્યો છે. 204 જેટલા પૂર્વ લશ્કરી અધિકારીઓ, રાજદ્વારીઓ, વરિષ્ઠ વકીલો અને અમલદારોએ એક સંયુક્ત ખુલ્લો પત્ર જારી કરીને રાહુલ ગાંધીના વર્તનની આકરી ટીકા કરી છે અને તેમને રાષ્ટ્રની માફી માંગવા જણાવ્યું છે.
'સંસદ નાટકનું મંચ નથી': પત્રમાં આકરા પ્રહારો
જમ્મુ-કાશ્મીરના પૂર્વ DGP એસ.પી. વૈદ્યના નેતૃત્વમાં લખાયેલા આ પત્રમાં આરોપ મૂકવામાં આવ્યો છે કે, 12 માર્ચના રોજ સંસદ ભવનના સંકુલમાં જે રીતે વિરોધ કરવામાં આવ્યો તે લોકસભા અધ્યક્ષના નિર્દેશોનું સ્પષ્ટ ઉલ્લંઘન હતું. પત્રમાં ટાંકવામાં આવ્યું છે કે, "સંસદ એ દેશની સર્વોચ્ચ લોકશાહી સંસ્થા છે, તેને રાજકીય નાટકનું મેદાન બનાવવું જોઈએ નહીં. સંસદના પગથિયાં પર બેસીને ચા-બિસ્કિટ ખાવા જેવું વર્તન જનપ્રતિનિધિઓને શોભતું નથી."
અધ્યક્ષની સત્તાનો અનાદર
નિવૃત્ત અધિકારીઓએ જણાવ્યું હતું કે, લોકસભા સ્પીકરના આદેશોનું ઉલ્લંઘન કરીને કરવામાં આવેલું આ પ્રદર્શન 'ઇરાદાપૂર્વકનો અનાદર' છે. પત્રમાં ભારપૂર્વક કહેવામાં આવ્યું છે કે સંસદની સીડીઓ, કોરિડોર અને લોબી સમાન ગૌરવ ધરાવે છે અને ત્યાં સાંસદોનું આચરણ ઉચ્ચ કક્ષાનું હોવું જોઈએ. આવા વર્તનથી માત્ર સંસદીય પ્રક્રિયાઓ જ નબળી પડતી નથી, પરંતુ લોકશાહી સંસ્થાઓની પ્રતિષ્ઠાને પણ વિશ્વ સ્તરે નુકસાન પહોંચે છે.
આત્મનિરીક્ષણની અપીલ
પત્રમાં સહી કરનારા 100 થી વધુ પૂર્વ સૈન્ય અધિકારીઓ અને વરિષ્ઠ અમલદારોએ રાહુલ ગાંધીને તેમના આચરણ પર આત્મનિરીક્ષણ કરવા અપીલ કરી છે. તેમણે લખ્યું છે કે, એક અબજથી વધુ લોકોની આકાંક્ષાઓનું પ્રતિનિધિત્વ કરતી સંસ્થાના રક્ષકો તરીકે સાંસદોએ એ ન ભૂલવું જોઈએ કે તેમના દરેક કાર્યનું પ્રતીકાત્મક મહત્વ હોય છે.
આ વિવાદ એવા સમયે વકર્યો છે જ્યારે સંસદના સત્ર દરમિયાન વિપક્ષ અને સત્તાધારી પક્ષ વચ્ચે પહેલેથી જ તણાવ ચાલી રહ્યો છે. હવે જોવાનું એ રહેશે કે વિપક્ષના નેતા આ ખુલ્લા પત્ર અને માફીની માંગ પર કેવી પ્રતિક્રિયા આપે છે.