વોશિંગ્ટન : પશ્ચિમ એશિયામાં ચાલી રહેલા ભીષણ યુદ્ધ વચ્ચે અમેરિકાના રાજકારણમાં મોટો ભૂકંપ આવ્યો છે. રાષ્ટ્રીય આતંકવાદ વિરોધી કેન્દ્રના ડિરેક્ટર જો કેન્ટે (Joe Kent) મંગળવારે પોતાના પદ પરથી રાજીનામું આપીને સનસનાટી મચાવી દીધી છે. તેમણે સ્પષ્ટ શબ્દોમાં જણાવ્યું છે કે તેઓ તેમના અંતરાત્માના અવાજ વિરુદ્ધ જઈને ઈરાનમાં ચાલી રહેલા આ યુદ્ધને સમર્થન આપી શકે તેમ નથી.
ઈઝરાયેલ લોબી પર આકરા પ્રહાર
સોશિયલ મીડિયા પ્લેટફોર્મ X પર પોતાના રાજીનામાનો પત્ર શેર કરતા જો કેન્ટે ચોંકાવનારો ખુલાસો કર્યો છે. તેમણે દલીલ કરી છે કે ઈરાન અમેરિકા માટે કોઈ તાત્કાલિક જોખમ નથી. તેમના મતે, અમેરિકાએ આ યુદ્ધ માત્ર ઈઝરાયેલ અને તેની શક્તિશાળી અમેરિકન લોબીના દબાણને વશ થઈને શરૂ કર્યું છે. કેન્ટના આ નિવેદને ટ્રમ્પ વહીવટીતંત્રની વિદેશ નીતિને લઈને આંતરરાષ્ટ્રીય સ્તરે વિવાદ છેડ્યો છે.
ઇરાક યુદ્ધ જેવી ભૂલનું પુનરાવર્તન?
રાષ્ટ્રપતિ ડોનાલ્ડ ટ્રમ્પને સંબોધિત પત્રમાં જો કેન્ટે નિરાશા વ્યક્ત કરી હતી. તેમણે કહ્યું કે જે વહીવટીતંત્ર મધ્ય પૂર્વના લાંબા યુદ્ધોનો વિરોધ કરતું હતું, તે જ હવે બીજા મોટા સંઘર્ષમાં કૂદી પડ્યું છે. તેમણે ચેતવણી આપી હતી કે ઈરાન પર લશ્કરી કાર્યવાહી એ ઇરાક યુદ્ધની ભૂલોનું પ્રતિબિંબ છે. ખોટી માહિતી અને યુદ્ધ તરફી પ્રભાવને કારણે અમેરિકા ફરી એકવાર એવા રસ્તે નીકળી પડ્યું છે જેમાં જાનમાલનું મોટું નુકસાન નિશ્ચિત છે.
યુદ્ધની માનવીય કિંમત પર ભાર
પોતે એક લડાયક અનુભવી અને 'ગોલ્ડ સ્ટાર પતિ' હોવાનો ઉલ્લેખ કરીને કેન્ટે જણાવ્યું કે તેઓ વધુ અમેરિકન સૈનિકોને એવા યુદ્ધમાં મોકલવા માંગતા નથી જે રાષ્ટ્રીય હિતમાં નથી. તેમણે રાષ્ટ્રપતિ ટ્રમ્પને વિનંતી કરી છે કે તેઓ ઈરાન પ્રત્યેના વર્તમાન અભિગમ પર ફરીથી વિચાર કરે, કારણ કે આ માર્ગ માત્ર અરાજકતા અને પતન તરફ દોરી જશે.
જો કેન્ટનું આ રાજીનામું અમેરિકામાં યુદ્ધ વિરોધી અવાજને મજબૂત કરી શકે છે અને આગામી દિવસોમાં વ્હાઇટ હાઉસ માટે મોટી મુશ્કેલીઓ ઉભી કરી શકે છે.