નવી દિલ્હી ખાતે ચાલુ રહેલા સંસદના સત્ર દરમિયાન રાજ્યસભામાં ખાનગી હેલ્થ ઈન્સ્યોરન્સ કંપનીઓ દ્વારા લેવામાં આવતા મનસ્વી પ્રીમિયમનો મુદ્દો ગાજ્યો હતો. મહેસાણાના સાંસદ મયંકભાઈ નાયકે આ બાબતે સરકારને તીખા સવાલ પૂછ્યા હતા કે ખાનગી કંપનીઓ ગ્રાહકો પાસેથી ઉંચા પ્રીમિયમ કેમ વસૂલે છે અને તેના પર સરકારનું શું નિયંત્રણ છે. આ પ્રશ્નોના પ્રત્યુત્તરમાં કેન્દ્રીય નાણામંત્રી નિર્મલા સીતારમણે સ્પષ્ટતા કરી હતી કે વીમા ક્ષેત્ર સંપૂર્ણપણે IRDAI દ્વારા નિયંત્રિત છે અને નિયમોનું ઉલ્લંઘન કરનાર કંપનીઓ સામે કડક દંડનીય કાર્યવાહી કરવામાં આવે છે.

મહેસાણાના સાંસદ મયંકભાઈ નાયકે ગૃહમાં રજૂઆત કરતા જણાવ્યું હતું કે, હાલમાં ખાનગી હેલ્થ ઈન્સ્યોરન્સ કંપનીઓ મનસ્વી રીતે પ્રીમિયમમાં વધારો કરી રહી છે, જેના કારણે સામાન્ય અને મધ્યમ વર્ગના લોકો પર આર્થિક બોજ વધી રહ્યો છે. તેમણે સરકાર પાસે એવી સ્પષ્ટતા માંગી હતી કે કંપનીઓની આ મનમાની રોકવા માટે સરકાર દ્વારા કયા પ્રકારના નિયંત્રણાત્મક પગલાં લેવામાં આવી રહ્યા છે? તેમણે ખાસ કરીને વરિષ્ઠ નાગરિકો અને જૂના પોલિસી ધારકો માટે અચાનક વધતા પ્રીમિયમ અંગે ચિંતા વ્યક્ત કરી હતી.

સાંસદના સવાલનો જવાબ આપતા નાણામંત્રી નિર્મલા સીતારમણે જણાવ્યું હતું કે ભારતમાં વીમા ક્ષેત્ર અત્યંત પારદર્શક રીતે કાર્ય કરે છે. તેમણે ગૃહને ખાતરી આપી હતી કે કોઈપણ વીમા કંપની પોતાની ઈચ્છા મુજબ નિયમોની બહાર જઈને પ્રીમિયમ વધારી શકતી નથી. વીમા ક્ષેત્રની નિયામક સંસ્થા IRDAI (IRDAI) દરેક કંપનીની પ્રવૃત્તિઓ પર સતર્ક નજર રાખે છે. જો કોઈ કંપની ગેરરીતિ આચરે અથવા ગ્રાહકોના હિત વિરુદ્ધ કામ કરે, તો તેના પર કડક પગલાં લેવામાં આવે છે.

નાણામંત્રીએ વધુમાં ઉમેર્યું હતું કે સરકારે ભૂતકાળમાં પણ આવી મનમાની સામે કડક વલણ અપનાવ્યું છે. તેમણે કેટલાક ઉદાહરણો આપતા જણાવ્યું હતું કે અનેક ખાનગી વીમા કંપનીઓ કે જેઓ ગ્રાહકોને ગેરમાર્ગે દોરતી હતી અથવા ખોટી બિઝનેસ પ્રેક્ટિસ કરતી હતી, તેમને IRDAI દ્વારા કરોડો રૂપિયાનો દંડ  ફટકારવામાં આવ્યો છે. સરકારનો મુખ્ય ઉદ્દેશ્ય વીમા ધારકોના અધિકારોનું રક્ષણ કરવાનો છે.

ગ્રાહકોની સુવિધા અને ન્યાય માટે નાણામંત્રીએ CP GRAMS પોર્ટલનો ઉલ્લેખ કર્યો હતો. તેમણે જણાવ્યું કે જો કોઈ ગ્રાહકને પોતાની વીમા કંપની સામે ફરિયાદ હોય અથવા પ્રીમિયમ વધારા બાબતે અસંતોષ હોય, તો તેઓ સીધા જ આ સરકારી પોર્ટલ પર ફરિયાદ નોંધાવી શકે છે. આ પોર્ટલ પર આવતી ફરિયાદોનું સમયમર્યાદામાં નિરાકરણ લાવવા માટે સરકાર પ્રતિબદ્ધ છે