દુબઈ, તા.૧૮: મધ્‍ય-પૂર્વના આકાશમાં અત્‍યારે શાંતિના બદલે મિસાઈલો અને ડ્રોનનો ગડગડાટ સંભળાઈ રહ્યો છે. ઈરાન અને ઈઝરાયલ વચ્‍ચે ચાલી રહેલું આ ભીષણ યુદ્ધ આજે તેના ૧૯મા દિવસમાં પ્રવેશી ચૂકયું છે, પરંતુ સ્‍થિતિ સુધરવાને બદલે વધુ વણસી રહી હોય તેવું લાગી રહ્યું છે. તાજેતરના અહેવાલો મુજબ, ઈરાને તેના સુરક્ષા વડા અલી લારીજાનીના ઈઝરાયલી હુમલામાં થયેલા મોતનો બદલો લેવા માટે ખાડી દેશો અને ઈઝરાયલ પર મિસાઈલોનો વરસાદ કર્યો છે. ઈરાને સત્તાવાર રીતે સ્‍વીકાર્યું છે કે લારીજાની હવે આ દુનિયામાં નથી, અને તેમની શહાદતનો બદલો લેવા માટે ઈરાને હવે ૬૧મા મોટા મિસાઈલ હુમલાની જાહેરાત કરીને સમગ્ર ક્ષેત્રમાં ભયનો માહોલ પેદા કર્યો છે.

આ યુદ્ધની સૌથી ભયાનક અસર પાડોશી ખાડી દેશો પર પડી રહી છે. કુવૈત નેશનલ ગાર્ડના સત્તાવાર નિવેદન અનુસાર, ઈરાન તરફથી મોકલવામાં આવેલા ૭ ઘાતક ડ્રોનને કુવૈતી વાયુસેનાએ સમયસર તોડી પાડ્‍યા છે. માત્ર કુવૈત જ નહીં, પરંતુ કતારના સંરક્ષણ મંત્રાલયે પણ પુષ્ટિ કરી છે કે તેમના સૈન્‍ય મથકો અને મહત્‍વના માળખાગત વિસ્‍તારોને નિશાન બનાવીને કરવામાં આવેલા મિસાઈલ હુમલાઓને નિષ્‍ફળ બનાવવામાં આવ્‍યા છે. સાઉદી અરેબિયા, યુનાઈટેડ આરબ અમીરાત અને બહેરીને પણ છેલ્લા કેટલાક કલાકોમાં સતત મિસાઈલ ડિફેન્‍સ સિસ્‍ટમનો ઉપયોગ કરીને અનેક હુમલાઓને હવામાં જ નેસ્‍તનાબૂદ કર્યા હોવાના અહેવાલો છે.

યુદ્ધની આ આગમાં માત્ર સૈન્‍ય જ નહીં, પરંતુ સામાન્‍ય જનજીવન અને માળખાગત સુવિધાઓ પણ હોમાઈ રહી છે. હુમલાઓને કારણે અનેક ઈમારતો અને પાવર ગ્રીડને નુકસાન થયું છે, જેના કારણે ગલ્‍ફ દેશોની અર્થવ્‍યવસ્‍થા પર પણ જોખમ મંડરાઈ રહ્યું છે. અમેરિકા આ સ્‍થિતિમાં ઈઝરાયલની પડખે ઊભું છે, જ્‍યારે ઈરાન તેના સાથી સંગઠનો સાથે મળીને વળતો પ્રહાર કરી રહ્યું છે. જો આ હુમલાઓનો સિલસિલો ન અટકયો, તો આગામી દિવસોમાં આ સંઘર્ષ વિશ્વ સ્‍તરે ઈંધણની કટોકટી અને આર્થિક અસ્‍થિરતા લાવી શકે છે. હાલમાં તમામ દેશોની નજર ઈરાનના આગામી પગલા પર ટકેલી છે.