નવી દિલ્‍હી/ઇન્‍દોરઃ વડાપ્રધાન નરેન્‍દ્ર મોદીએ આઇટીવી (iTV) નેટવર્કની એનએક્‍સટી (NXT) સમિટમાં સંબોધન કરતા ૧૯૩૦ની દાંડી કૂચને યાદ કરી ૧૪૦ કરોડ ભારતીયોના 'વિકસિત ભારત'ના સામૂહિક લક્ષ્ય પર ભાર મૂક્‍યો. તેમણે યુપીઆઇ (UPI) દ્વારા ડિજિટલ પેમેન્‍ટથી લઈને ઊર્જા સુરક્ષા (એલપીજી, સીએનજી, ઇથેનોલ) ક્ષેત્રે મળેલી ઐતિહાસિક સફળતાઓ વર્ણવી. આ ઉપરાંત, રશિયા-યુક્રેન યુદ્ધ વચ્‍ચે ખાતરના ભાવ નિયંત્રણ, આંતરિક સુરક્ષા (નક્‍સલવાદના ખાતમા) અને વૈશ્વિક નેતાઓ દ્વારા ભારત પર મૂકવામાં આવતા વિશ્વાસ વિશે વિસ્‍તૃત વાત કરી. અન્‍ય એક દુઃખદ ઘટનામાં, મધ્‍યપ્રદેશના ઇન્‍દોરમાં થયેલા અગ્નિકાંડમાં જીવ ગુમાવનારા લોકો પ્રત્‍યે પીએમ મોદીએ સંવેદના વ્‍યક્‍ત કરી સહાયની જાહેરાત કરી હતી.

વડાપ્રધાન નરેન્‍દ્ર મોદીએ આજે એનએક્‍સટી (NXT) સમિટમાં સંબોધન કરતા દેશના વિકાસ અને સુરક્ષા અંગે હુંકાર ભર્યો હતો. તેમણે ૧૯૩૦ની ઐતિહાસિક દાંડી કૂચની તુલના વર્તમાન સમયના 'વિકસિત ભારત'ના વિઝન સાથે કરી હતી. તેમણે કહ્યું કે, ક્રિકેટના ટી-૨૦ (T-20) વર્લ્‍ડ કપના સ્‍કોરની જેમ હવે નાગરિકો દેશના આર્થિક વિકાસની 'રનિગ કોમેન્‍ટ્રી' ઈચ્‍છે છે.

નેક્‍સ્‍ટ લેવલ ઇન્‍ફ્રાસ્‍ટ્રક્‍ચર અને રિફોર્મ્‍સ

પીએમ મોદીએ જણાવ્‍યું કે ભારત હવે માત્ર પ્રગતિ નથી કરી રહ્યું, પરંતુ 'નેક્‍સ્‍ટ લેવલ' પર પહોંચી ગયું છે. યુપીઆઇ (UPI) થકી ભારત આજે રિયલ-ટાઇમ ડિજિટલ વ્‍યવહારોમાં વિશ્વમાં મોખરે છે. જન ધન ખાતા દ્વારા ૫૦ કરોડથી વધુ નાગરિકોને બેન્‍કિંગ સિસ્‍ટમ સાથે જોડવા, કલમ ૩૭૦ નાબૂદ કરવી અને વિધાનસભાઓમાં મહિલાઓ માટે ૩૩ ટકા અનામત જેવા ક્રાંતિકારી નિર્ણયો લેવાયા છે. અંતરિક્ષ, સેમિકન્‍ડક્‍ટર અને ક્‍વોન્‍ટમ મિશન દ્વારા ભારતે ટેકનોલોજીની નવી ઊંચાઈઓ સર કરી છે.

ઊર્જા અને રેલવે ક્ષેત્રે હરણફાળ

વડાપ્રધાને માહિતી આપતા કહ્યું કે દેશમાં પાઈપ્‍ડ નેચરલ ગેસ (PNG) નો વ્‍યાપ ૨૫-૨૬ લાખ ઘરોથી વધીને ૧.૨૫ કરોડ ઘરો સુધી પહોંચ્‍યો છે. દેશના ૬૦૦ થી વધુ જિલ્‍લાઓમાં સિટી ગેસ ડિસ્‍ટ્રિબ્‍યુશન નેટવર્ક ઊભું કરાયું છે. રેલવેના (ઇલેક્‍ટ્રિફિકેશન) વિશે વાત કરતા તેમણે કહ્યું કે ૨૦૧૪માં માત્ર ૨૦ ટકા બ્રોડ-ગેજ નેટવર્ક ઇલેક્‍ટ્રિફાઇડ હતું, જે આજે ૧૦૦ ટકાની નજીક છે. આનાથી ૨૦૨૪-૨૫ માં ૧૮૦ કરોડ લિટર ડીઝલની બચત થશે. દેશની રિન્‍યુએબલ એનર્જીની ક્ષમતા ૨ ગીગાવોટ (GW) થી ઉછળીને ૧૩૦ ગીગાવોટ થઈ છે અને કુલ ક્ષમતા ૨૫૦ ગીગાવોટ સુધી પહોંચી છે.

આ ઉપરાંત ગોવર્ધન (GOBARdhan) યોજના હેઠળ ૧૦૦ થી વધુ બાયો-ગેસ પ્‍લાન્‍ટ કાર્યરત છે અને ૬૦૦ પ્રગતિમાં છે. વ્‍યૂહાત્‍મક પેટ્રોલિયમ રિઝર્વ ૫૦ લાખ ટનથી વધુ કરવામાં આવ્‍યું છે અને રિફાઇનિગ ક્ષમતામાં ૪૦ મિલિયન ટનનો વધારો થયો છે.

ગરીબ કલ્‍યાણ અને આંતરિક સુરક્ષા

એસ્‍પિરેશનલ ડિસ્‍ટ્રિક્‍ટ પ્રોગ્રામ અને પીએમ જનમન (PM JANMAN) દ્વારા સરકારે છેવાડાના વિસ્‍તારોમાં આવાસ, આરોગ્‍ય અને શિક્ષણ જેવી પાયાની સુવિધાઓ પહોંચાડી છે. વડાપ્રધાને રાજ્‍ય સરકારોને પણ અપીલ કરી હતી કે વૈશ્વિક સંકટના સમયમાં કાળાબજારી અને અફવાઓ રોકવા કડક નજર રાખવામાં આવે.

ઇન્‍દોર અગ્નિકાંડઃ પીએમ મોદી દ્વારા સહાયની જાહેરાત

૧૮ માર્ચ ૨૦૨૬ ના રોજ મધ્‍યપ્રદેશના ઇન્‍દોરમાં સર્જાયેલી આગની ગોઝારી ઘટના અંગે વડાપ્રધાને ઊંડા શોકની લાગણી વ્‍યક્‍ત કરી હતી. તેમણે એક્‍સ (X) પર પોસ્‍ટ કરતા લખ્‍યું કે ઇન્‍દોરમાં થયેલી જાનહાનિથી તેઓ અત્‍યંત દુઃખી છે. વડાપ્રધાને પ્રધાનમંત્રી રાષ્ટ્રીય રાહત ભંડોળ (PMNRF) માંથી મૃતકોના વારસદારોને ૨ લાખ રૂપિયા અને ઈજાગ્રસ્‍તોને ૫૦,૦૦૦ રૂપિયાની આર્થિક સહાય આપવાની જાહેરાત કરી છે.

આંતરિક સુરક્ષામાં મોટી જીત અને કલ્‍યાણકારી યોજનાઓ

દેશમાં ૨,૧૦૦ થી વધુ નક્‍સલીઓએ આત્‍મસમર્પણ કર્યું છે અને ૩૦૦ થી વધુ કટ્ટર આતંકવાદીઓનો સફાયો કરવામાં આવ્‍યો છે. સરકારે યુદ્ધની વૈશ્વિક અસરો વચ્‍ચે પણ ખેડૂતોને ૩,૦૦૦ રૂપિયાની યુરિયાની થેલી માત્ર ૩૦૦ રૂપિયામાં પૂરી પાડી છે. 'પીએમ સૂર્ય ઘર મફત વીજળી યોજના'થી ૩૦ લાખ પરિવારોને છત પર સોલાર લગાવીને વીજળી પેદા કરવા સક્ષમ બનાવ્‍યા છે.

વિશ્વના દિગ્‍ગજ નેતાઓને ભારત પર અતૂટ ભરોસો

ફિનલેન્‍ડના રાષ્ટ્રપતિ એલેક્‍ઝાન્‍ડર સ્‍ટબ માને છે કે વિશ્વની દિશા હવે 'ગ્‍લોબલ સાઉથ' નક્કી કરશે. કેનેડાના માર્ક કાર્નીના મતે આગામી ત્રણ દાયકામાં વિશ્વનું આર્થિક કેન્‍દ્ર ભારત તરફ ખસી રહ્યું છે, જ્‍યારે ફ્રાન્‍સના રાષ્ટ્રપતિ મેક્રોન ભારતને વૈશ્વિક પડકારો ઉકેલવા માટે આવશ્‍યક ભાગીદાર માને છે. પીએમ મોદીએ ગર્જના કરતા કહ્યું, જો તમારે ભવિષ્‍યનો હિસ્‍સો બનવું હોય, તો તમારે ભારત સાથે જોડાવું જ પડશે.

ઊર્જા ક્ષેત્રે ઐતિહાસિક ક્રાંતિ અને આત્‍મનિર્ભરતા

વર્ષ ૨૦૧૪માં એલપીજી (LPG) કનેક્‍શન માત્ર ૧૪ કરોડ હતા, જે આજે ઉછળીને ૩૩ કરોડ થઈ ગયા છે. ગેસ પાઈપલાઈનનું નેટવર્ક ૩,૫૦૦ કિલોમીટરથી વધીને ૧૦,૦૦૦ કિલોમીટર સુધી પહોંચ્‍યું છે. જ્‍યારે સીએનજી (CNG) વાહનોની સંખ્‍યા ૧૦ લાખથી વધીને ૭૦ લાખને પાર થઈ ગઈ છે. ઇથેનોલ બ્‍લેન્‍ડિંગ ૧-૧.૫ ટકાથી વધીને ૨૦ ટકા સુધી પહોંચ્‍યું, જેનાથી દેશના ૧.૫ લાખ કરોડ રૂપિયા બચ્‍યા છે અને ૪.૫ કરોડ બેરલ તેલની આયાત ઘટી છે.