હવે માત્ર એક નહીં, અનેક મંત્રાલયો વાંધાજનક કન્ટેન્ટ પર ચલાવી શકશે ‘કાતર'
ડિજિટલ દુનિયા પર સરકારનો કડક પહેરોઃ કટોકટીના સમયે તાત્કાલિક કાર્યવાહી માટે કેન્દ્ર સરકારનો માસ્ટર પ્લાન : ફેસબુક, એક્સ અને યુટયુબ જેવા પ્લેટફોર્મ્સ પરથી ગેરકાયદેસર સામગ્રી હટાવવા હવે ગળહ, સંરક્ષણ અને વિદેશ મંત્રાલય સીધા આદેશ આપી શકશે
નવી દિલ્હી, તા.૧૮: ભારત સરકાર ડિજિટલ સ્પેસમાં સુરક્ષા અને વ્યવસ્થા જાળવવા માટે કાયદાકીય માળખામાં ધરખમ ફેરફાર કરવા જઈ રહી છે. અત્યાર સુધી ઇન્ટરનેટ પર કોઈપણ વેબસાઇટ બ્લોક કરવા કે સોશિયલ મીડિયા પોસ્ટ હટાવવાની સત્તા માત્ર ઇલેક્ટ્રોનિક્સ અને આઇટી મંત્રાલય પાસે જ હતી, પરંતુ હવે માહિતી ટેકનોલોજી અધિનિયમ, ૨૦૦૦ ની કલમ ૬૯(A) માં સુધારો કરીને આ સત્તાનો વ્યાપ વધારવાની યોજના છે. નવા પ્રસ્તાવ મુજબ, હવે ગળહ મંત્રાલય, વિદેશ મંત્રાલય અને સંરક્ષણ મંત્રાલય જેવા મહત્વના વિભાગો પણ સીધા જ ઓનલાઇન કન્ટેન્ટને અવરોધિત કરવાના આદેશ આપી શકશે. આ પગલાનો મુખ્ય ઉદ્દેશ્ય કટોકટીની સ્થિતિમાં સમય બચાવવાનો અને જે-તે ક્ષેત્રના નિષ્ણાત મંત્રાલયો દ્વારા વધુ સચોટ નિર્ણય લેવાનો છે.
આ સુધારાની સીધી અસર ફેસબુક, ઇન્સ્ટાગ્રામ, એક્સ (ટ્વિટર) અને યુટયુબ જેવા સોશિયલ મીડિયા જાયન્ટ્સ પર પડશે. અત્યાર સુધી આ કંપનીઓને માત્ર એક જ મંત્રાલય તરફથી ઔપચારિક નોટિસ મળતી હતી, પરંતુ હવે તેમણે વિવિધ મંત્રાલયો અને નિયમનકારોના આદેશોનું પાલન કરવું પડશે. ઉદાહરણ તરીકે, જો ભારતની અખંડિતતા કે રક્ષાને લગતી કોઈ વાંધાજનક સામગ્રી વાયરલ થાય, તો સંરક્ષણ મંત્રાલય તેની ગંભીરતાને આધારે આઇટી મંત્રાલયની રાહ જોયા વિના સીધી કાર્યવાહી કરી શકશે. સરકારનું માનવું છે કે જે મંત્રાલય જે વિષયમાં નિષ્ણાત હોય, તે સામગ્રીની ગેરકાયદેસર પ્રકળતિને વધુ સારી રીતે સમજી શકે છે, જેનાથી રાષ્ટ્રીય સુરક્ષા અને જાહેર વ્યવસ્થા જાળવવામાં સરળતા રહેશે.
હાલમાં આ પ્રસ્તાવ પર વિવિધ હિતધારકો અને વરિષ્ઠ સરકારી અધિકારીઓ વચ્ચે ગહન ચર્ચા ચાલી રહી છે. કલમ ૬૯(A) ઉપરાંત કલમ ૭૯(3)(b) હેઠળ પણ સોશિયલ મીડિયા મધ્યસ્થીઓને સૂચનાઓ આપવાની પ્રક્રિયાને વધુ વેગવંતી બનાવવામાં આવશે. જોકે, આ સત્તાઓના વિતરણમાં પારદર્શિતા અને જવાબદારી જાળવવી એ સરકાર માટે મોટો પડકાર હશે. અધિકારીઓના જણાવ્યા અનુસાર, મંત્રાલયોએ કટોકટીની દ્રષ્ટિએ સામગ્રી અવરોધિત કરવાની પ્રકળતિ અને તેની અનિવાર્યતા પ્રત્યે અત્યંત સંવેદનશીલ રહેવું પડશે. ટૂંક સમયમાં આ સુધારા અંગે સત્તાવાર જાહેરાત થવાની શકયતા છે, જે ભારતના ડિજિટલ લેન્ડસ્કેપમાં નવા યુગની શરૂઆત કરશે.
(3:10 PM IST)
છેલ્લા 8 દિવસમાં સૌથી લોકપ્રિય 
