કોલંબો, તા.૧૮: શ્રીલંકા ફરી એકવાર આર્થિક કટોકટીના ઉંબરે આવીને ઊભું હોય તેવું લાગી રહ્યું છે. મધ્ય-પૂર્વમાં ઇઝરાયેલ અને ઈરાન વચ્ચે વધતા જતા તણાવ અને લાંબા સમય સુધી યુદ્ધ ચાલવાની આશંકાએ શ્રીલંકા સરકારની ઊંઘ ઉડાડી દીધી છે. દ્વીપસમૂહ દેશે તેના મર્યાદિત ઇંધણ ભંડારને સુરક્ષિત રાખવા માટે તાત્કાલિક અસરથી સરકારી સંસ્થાઓમાં અઠવાડિયામાં માત્ર ચાર દિવસ કામ કરવાની જાહેરાત કરી છે.

આવશ્યક સેવાઓના કમિશનર-જનરલ પ્રભથ ચંદ્રકીર્થીએ સોમવારે પત્રકારોને સંબોધતા જણાવ્યું હતું કે, "આગામી બુધવારથી તમામ રાજ્ય સંસ્થાઓ, શાળાઓ અને યુનિવર્સિટીઓ અઠવાડિયામાં માત્ર ચાર દિવસ કાર્યરત રહેશે." આ નિર્ણય પાછળનું મુખ્ય કારણ હોર્મુઝની સામુદ્રધુની (Strait of Hormuz) પર સર્જાયેલ અવરોધ છે. ઈરાને આ મુખ્ય જળમાર્ગને અસરકારક રીતે બંધ કરી દીધો હોવાથી વૈશ્વિક નિકાસ અને ખાસ કરીને તેલના પુરવઠાને મોટી અસર પહોંચી છે. શ્રીલંકા તેના તેલ અને વીજળી માટેના કોલસા માટે સંપૂર્ણપણે આયાત પર નિર્ભર છે, તેથી સરકારે અત્યારથી જ કરકસરના પગલાં ભરવાનું શરૂ કર્યું છે.

પ્રમુખ અનુરા કુમારા દિસાનાયકેની અધ્યક્ષતામાં મળેલી કટોકટીની બેઠકમાં લેવાયેલા આ નિર્ણય મુજબ, હોસ્પિટલો, બંદરો અને અન્ય કટોકટીની સેવાઓ ચાલુ રહેશે, પરંતુ અન્ય સરકારી કર્મચારીઓને શક્ય હોય ત્યાં સુધી 'વર્ક ફ્રોમ હોમ' કરવા સૂચના અપાઈ છે. પ્રમુખે સ્પષ્ટ શબ્દોમાં ચેતવણી આપી છે કે, "આપણે સૌથી ખરાબ પરિસ્થિતિ માટે તૈયાર રહેવું જોઈએ." એટલું જ નહીં, સરકારે ખાનગી ક્ષેત્રને પણ સહકાર આપવા અને દર બુધવારે રજા જાહેર કરવા વિનંતી કરી છે.

ઇંધણની અછતને પહોંચી વળવા માટે દેશમાં રવિવારથી જ રેશનિંગ સિસ્ટમ લાગુ કરી દેવામાં આવી છે. સામાન્ય વાહનચાલકો હવે અઠવાડિયામાં માત્ર ૧૫ લિટર પેટ્રોલ કે ડીઝલ મેળવી શકશે, જ્યારે જાહેર પરિવહન માટે ૨૦૦ લિટરની મર્યાદા નક્કી કરાઈ છે. અધિકારીઓના જણાવ્યા મુજબ દેશ પાસે હાલમાં માત્ર છ અઠવાડિયા ચાલે તેટલો જ સ્ટોક ઉપલબ્ધ છે. ૨૦૨૨ના આર્થિક પતન અને દેવા માફીના સંઘર્ષ બાદ માંડ બેઠું થઈ રહેલું શ્રીલંકા જો આ યુદ્ધ લાંબુ ચાલશે તો ફરી એકવાર ગંભીર આર્થિક મંદીમાં ધકેલાઈ શકે છે.