નવી દિલ્હી, તા.૧૮: પશ્ચિમ બંગાળના મુખ્યમંત્રી મમતા બેનર્જી અને કેન્દ્રીય તપાસ એજન્સી એન્ફોર્સમેન્ટ ડિરેક્ટોરેટ (ED) વચ્ચે ચાલી રહેલા સંઘર્ષમાં સુપ્રીમ કોર્ટે રાજ્ય સરકારની ઝાટકણી કાઢી છે. ચૂંટણી વ્યૂહરચનાકાર સંસ્થા I-PAC અને તેના વડા પ્રતીક જૈનના નિવાસસ્થાને પડેલા દરોડા દરમિયાન મુખ્યમંત્રીના હસ્તક્ષેપને કોર્ટે ગંભીર ગણાવ્યો છે. જસ્ટિસ પ્રશાંત કુમાર મિશ્રા અને એન.વી. અંજારિયાની બેન્ચે સ્પષ્ટ શબ્દોમાં કહ્યું કે, "તમે જે કર્યું તે ખોટું હતું, આ પ્રકારની સ્થિતિ સ્વીકાર્ય નથી."

આ વિવાદની શરૂઆત ત્યારે થઈ હતી જ્યારે કોલસાની દાણચોરી અને હવાલા વ્યવહારના કેસમાં ED ની ટીમ I-PAC ના કાર્યાલયે પહોંચી હતી. તે સમયે મમતા બેનર્જી પોતે ઘટનાસ્થળે પહોંચી ગયા હતા અને તપાસ અધિકારીઓ સાથે ઘર્ષણમાં ઉતર્યા હતા. તેમણે એવો ગંભીર આરોપ લગાવ્યો હતો કે ED તેમની પાર્ટી (TMC) નો અત્યંત સંવેદનશીલ ડેટા અને હાર્ડ ડ્રાઈવો ચોરી રહી છે. આ મામલો સુપ્રીમ કોર્ટમાં પહોંચતા, કોર્ટે મુખ્યમંત્રીના આ વર્તનને અસામાન્ય અને નબળું ગણાવ્યું છે.

સુનાવણી દરમિયાન જ્યારે બંગાળ સરકારના વકીલ શ્યામ દિવાને જવાબ રજૂ કરવા માટે વધુ સમય માંગ્યો અને કેટલીક શરતો મૂકવાનો પ્રયાસ કર્યો, ત્યારે જસ્ટિસ મિશ્રાએ વળતો પ્રહાર કરતા કહ્યું, "તમે અમને આદેશ આપી શકતા નથી કે અમારે શું ધ્યાને લેવું અને શું અવગણવું. અમે બધું જ વિચારીશું." કોર્ટે એ બાબતે પણ નારાજગી વ્યક્ત કરી કે રાજ્ય સરકાર પાસે ED ના આરોપોનો કોઈ લેખિત જવાબ નથી અને તેઓ માત્ર સુનાવણી લંબાવવાનો પ્રયાસ કરી રહ્યા છે.

બીજી તરફ, પશ્ચિમ બંગાળ સરકારે આ કેસને પાંચ ન્યાયાધીશોની બંધારણીય બેંચ પાસે મોકલવાની માંગ કરી હતી. તેમની દલીલ હતી કે કેન્દ્રીય એજન્સીઓ સીધી રીતે રાજ્ય વિરુદ્ધ કલમ ૩૨ નો ઉપયોગ કરી શકે નહીં, કારણ કે તે દેશના સંઘીય માળખા (Federal Structure) ને નબળું પાડે છે. જોકે, સુપ્રીમ કોર્ટે હાલના તબક્કે આ દલીલોને ગ્રાહ્ય રાખી નથી અને રાજ્ય સરકારના વલણને કાયદાકીય રીતે નબળું ગણાવ્યું છે. આ ચુકાદાથી બંગાળ સરકાર માટે કાયદાકીય મુશ્કેલીઓ વધી શકે તેમ છે.