બેંગલુરુ: સોશિયલ મીડિયા પર ફેમસ થવાની ઘેલછામાં લોકો કઈ હદ સુધી જઈ શકે છે, તેનો એક કમકમાટીભર્યો કિસ્સો બેંગલુરુના વ્યાલિકાવલ વિસ્તારમાં સામે આવ્યો છે. અહીં એક મહિલા અને તેના પરિવારે માત્ર એક 'રીલ' બનાવવા માટે પોતાના જ વૃદ્ધ પિતાના જીવને જોખમમાં મૂકી દીધો હતો. આ પરિવારે પિતાને એક મોટા કોથળામાં બંધ કરી કુરિયર ઓફિસમાં પાર્સલ તરીકે મોકલવાનો પ્રયાસ કરતા ચકચાર મચી ગઈ છે.

ઘટનાની વિગતો મુજબ, આ પરિવાર વ્યાલિકાવલ પોલીસ સ્ટેશનના વિસ્તારમાં આવેલી એક કુરિયર ઓફિસમાં એક મોટો કોથળો લઈને પહોંચ્યો હતો. ઓફિસના સ્ટાફને આ પાર્સલ પર શંકા જતા તેમણે તેની તપાસ કરી હતી. જ્યારે કોથળો ખોલવામાં આવ્યો ત્યારે અંદરથી એક વૃદ્ધ માણસ મળી આવતા સ્ટાફ સ્તબ્ધ થઈ ગયો હતો. ગૂંગળામણને કારણે વૃદ્ધની હાલત લથડી રહી હતી અને તેમને શ્વાસ લેવામાં તકલીફ પડી રહી હતી.

કેમ કર્યો આવો વિચિત્ર સ્ટંટ?

જ્યારે કુરિયર સ્ટાફે આ અંગે પરિવારની પૂછપરછ કરી, ત્યારે તેમણે જે જવાબ આપ્યો તે સાંભળીને સૌ કોઈ ચોંકી ગયા હતા. પરિવારે જણાવ્યું કે તેઓ ઉગાદી અને રમઝાન જેવા તહેવારોમાં બસની ટિકિટ ન મળતી હોવાથી મુસાફરીની મુશ્કેલીઓ દર્શાવતી એક 'રમુજી રીલ' બનાવી રહ્યા હતા. તેમના મતે, જો ટિકિટ ન મળે તો વ્યક્તિને 'કુરિયર' કરી શકાય તેવો રમુજી વિચાર તેઓ સોશિયલ મીડિયા પર શેર કરવા માંગતા હતા. આશ્ચર્યની વાત એ છે કે, સ્ટાફે વાંધો ઉઠાવ્યો છતાં પરિવાર આ પાર્સલ મોકલવા માટે જીદ કરી રહ્યો હતો.

મામલો બિચકતા પોલીસે તાત્કાલિક ઘટનાસ્થળે પહોંચી પરિવારને કસ્ટડીમાં લીધો હતો. પોલીસ સ્ટેશનમાં લઈ ગયા બાદ પરિવારે પોતાની ભૂલ સ્વીકારી હતી અને ભવિષ્યમાં આવું જોખમી કૃત્ય ન કરવાની ખાતરી આપતો માફીનો વીડિયો રેકોર્ડ કર્યો હતો. પોલીસે પરિવારને કડક ચેતવણી આપીને હાલમાં કોઈ ઔપચારિક કેસ નોંધ્યા વિના છોડી દીધા છે. આ ઘટનાએ સોશિયલ મીડિયા પર 'લાઈક્સ' અને 'વ્યૂઝ' મેળવવા માટે વૃદ્ધો અને પરિવારો સાથે થતા અમાનવીય વર્તન સામે ગંભીર સવાલો ઉભા કર્યા છે.