પુરી : ચૈત્ર નવરાત્રીના પવિત્ર પર્વનો પ્રારંભ થવા જઈ રહ્યો છે ત્યારે ઓડિશાના મયુરભંજ જિલ્લામાં સ્થિત પ્રસિદ્ધ સિદ્ધપીઠ 'માં હિંગુલા' ના મંદિરમાં ભક્તોનું ઘોડાપૂર ઉમટવા તૈયાર છે. ૧૯ માર્ચથી માતાજી નવ અલગ-અલગ દૈવી સ્વરૂપોમાં ભક્તોને દર્શન આપશે. આ મંદિરની સૌથી મોટી વિશેષતા એ છે કે અહીં માતાજીને 'અગ્નિ દેવી' તરીકે પૂજવામાં આવે છે અને તેમનો સીધો સંબંધ વિશ્વપ્રસિદ્ધ પુરીના જગન્નાથ મંદિર સાથે જોડાયેલો છે.

સ્થાનિક દંતકથા અનુસાર, ભગવાન જગન્નાથજીએ પોતે પુરીના રાજાને સ્વપ્નમાં આવીને માં હિંગુલાની પૂજા કરવાનો આદેશ આપ્યો હતો. ભગવાન ઈચ્છતા હતા કે જગન્નાથ મંદિરના વિશાળ રસોડામાં જે મહાપ્રસાદ બને છે, તેનું સંચાલન માં હિંગુલા સ્વયં અગ્નિ સ્વરૂપે કરે. માનવામાં આવે છે કે આજે પણ જગન્નાથજીના રસોડામાં જે પવિત્ર અગ્નિ પ્રગટે છે, તે માં હિંગુલાનું જ સ્વરૂપ છે. આ જ કારણ છે કે ચૈત્ર મહિનામાં અહીં ભવ્ય 'હિંગુલા યાત્રા' નું આયોજન કરવામાં આવે છે, જે ઓડિશાની સંસ્કૃતિ અને આધ્યાત્મિકતાનો અનોખો સંગમ છે.

મયુરભંજ સ્થિત આ ભવ્ય મંદિરમાં માતાજીની સોનાથી મઢેલી ચતુર્ભુજ મૂર્તિ બિરાજમાન છે. નવરાત્રીના નવ દિવસ દરમિયાન અહીં અદભૂત શણગાર કરવામાં આવે છે. શ્રદ્ધાળુઓ અહીં દર્શન કર્યા બાદ અગ્નિ કુંડમાં પ્રસાદ અર્પણ કરે છે. ભક્તોમાં એવી પ્રબળ માન્યતા છે કે માતાજીના અગ્નિ સ્વરૂપના દર્શન કરવાથી જીવનની તમામ અડચણો અને દુઃખો બળીને ભસ્મ થઈ જાય છે.

ચૈત્ર નવરાત્રી દરમિયાન અહીં મોટો મેળો ભરાય છે. લોકો ખાસ કરીને પોતાના નવજાત શિશુઓને માતાજીના આશીર્વાદ અપાવવા અને મુંડન સંસ્કાર કરાવવા માટે દૂર-દૂરથી આવે છે. અગ્નિ અને શક્તિની આ ઉપાસના માત્ર ધાર્મિક વિધિ નથી, પરંતુ જગન્નાથ સંસ્કૃતિના અતૂટ વિશ્વાસનું પ્રતીક છે. આ નવરાત્રીમાં માં હિંગુલાના આશીર્વાદ લેવા માટે ભક્તોમાં અત્યારથી જ ભારે ઉત્સાહ જોવા મળી રહ્યો છે.