પટના: બિહારની રાજધાની પટનામાં બુધવારે બપોરે ભારે અફરાતફરીનો માહોલ સર્જાયો હતો. UGC (યુનિવર્સિટી ગ્રાન્ટ્સ કમિશન) ના નવા રેગ્યુલેશન અને શિક્ષણ ક્ષેત્રે ૬૫% અનામત (SC-ST, EBC-BC) લાગુ કરવાની માંગ સાથે રસ્તા પર ઉતરેલા હજારો વિદ્યાર્થીઓ પર પોલીસે નિર્મમ લાઠીચાર્જ કરતા મામલો બિચક્યો છે. વામપંથી સંગઠનો અને છાત્ર સંઘો દ્વારા આયોજિત આ પ્રદર્શન દરમિયાન પટનાની સડકો રણમેદાનમાં ફેરવાઈ ગઈ હતી.
   મળતી વિગતો મુજબ, વિદ્યાર્થીઓ UGC ના અમુક નવા દિશાનિર્દેશોનો વિરોધ કરી રહ્યા હતા, જેમના મતે આ નિયમો વિદ્યાર્થીઓના હિતની વિરુદ્ધ છે. પ્રદર્શનકારીઓ જ્યારે પ્રતિબંધિત વિસ્તારમાં પ્રવેશવાનો પ્રયાસ કરી રહ્યા હતા ત્યારે પોલીસે તેમને રોકવા માટે પહેલા સમજાવ્યા હતા, પરંતુ સ્થિતિ કાબૂ બહાર જતાં પોલીસે વોટર કેનનનો ઉપયોગ કર્યો હતો અને ત્યારબાદ જોરદાર લાઠીચાર્જ શરૂ કર્યો હતો. પોલીસના આ એક્શનમાં અનેક વિદ્યાર્થીઓને ઈજાઓ પહોંચી છે.
     વિદ્યાર્થી નેતાઓએ આક્ષેપ કર્યો છે કે સરકાર શાંતિપૂર્ણ રીતે પ્રદર્શન કરી રહેલા યુવાનોનો અવાજ દબાવવા માટે પોલીસનો સહારો લઈ રહી છે. "UGC Roll Back" ના નારા સાથે વિદ્યાર્થીઓએ સ્પષ્ટ કર્યું છે કે જ્યાં સુધી તેમની માંગણીઓ પૂરી કરવામાં નહીં આવે ત્યાં સુધી આ આંદોલન ચાલુ રહેશે. બીજી તરફ, પોલીસ પ્રશાસનનું કહેવું છે કે કાયદો અને વ્યવસ્થા જાળવી રાખવા માટે આ પગલું ભરવું અનિવાર્ય હતું.
આ ઘટના બાદ પટનામાં સુરક્ષા વ્યવસ્થા સખત કરી દેવામાં આવી છે અને મહત્વના સ્થળો પર વધારાની પોલીસ ફોર્સ તૈનાત કરવામાં આવી છે. શિક્ષણ જગત સાથે જોડાયેલા આ વિવાદે હવે રાજકીય વળાંક પણ લીધો છે, જેમાં વિરોધ પક્ષોએ નીતીશ સરકાર પર પ્રહારો કરવાનું શરૂ કર્યું છે. આવતીકાલે આ મુદ્દે સુપ્રીમ કોર્ટમાં પણ મહત્વની સુનાવણી થવાની છે, જેના પર સમગ્ર દેશના વિદ્યાર્થીઓની નજર ટકેલી છે