નવી દિલ્હી : પશ્ચિમ એશિયામાં ચાલી રહેલા ભયાનક યુદ્ધના કારણે ભારતમાં રાંધણ ગેસ (LPG) ના પુરવઠા પર માઠી અસર પડી છે. દેશભરમાં સર્જાયેલી અછતને પહોંચી વળવા માટે કેન્દ્ર સરકારે બુધવારે તમામ રાજ્યો માટે LPG ક્વોટામાં ૧૦% ના વધારાની જાહેરાત કરી છે. વડાપ્રધાન નરેન્દ્ર મોદીએ આ ગંભીર સ્થિતિ અંગે પેટ્રોલિયમ મંત્રી હરદીપ સિંહ પુરી સાથે બે કલાક લાંબી બેઠક યોજી હતી, જેમાં દેશના ઇમરજન્સી ઓઇલ રિઝર્વ (SPR) ની પણ સમીક્ષા કરવામાં આવી હતી.

પેટ્રોલિયમ મંત્રાલયના જણાવ્યા અનુસાર, સ્થાનિક ઉત્પાદનમાં ૪૦% નો વધારો થયો હોવા છતાં વિતરકો પાસે હજુ પણ લાંબી લાઈનો જોવા મળી રહી છે. સરકારે લોકોને અપીલ કરી છે કે જ્યાં શક્ય હોય ત્યાં LPG ને બદલે PNG (પાઈપ્ડ નેચરલ ગેસ) પર સ્વિચ કરો જેથી સિલિન્ડર પરનું દબાણ ઘટે. આ સાથે જ કાળાબજાર રોકવા માટે દેશભરમાં ૨,૩૦૦ થી વધુ આઉટલેટ્સ પર અચાનક તપાસ હાથ ધરવામાં આવી છે.

ગુજરાતના બંદરો પર પહોંચ્યા ત્રણ ભારતીય જહાજો

યુદ્ધના ભયાનક માહોલ વચ્ચે ભારત માટે રાહતના સમાચાર એ છે કે 'નંદા દેવી', 'શિવાલિક' અને 'જગ લડકી' નામના ત્રણ ભારતીય જહાજો હોર્મુઝની ખાડી પાર કરીને ગુજરાતના વાડીનાર અને અન્ય બંદરો પર સુરક્ષિત રીતે પહોંચી ગયા છે. આ જહાજોમાં રહેલો ગેસનો જથ્થો ઉતારવાની કામગીરી તેજ ગતિએ ચાલી રહી છે, જેનાથી આગામી દિવસોમાં પુરવઠો સુધરવાની આશા છે.

બુકિંગના નિયમો અને e-KYC અંગે સ્પષ્ટતા

ગેસ એજન્સીઓ પર વધી રહેલી ભીડને જોતા સરકારે સ્પષ્ટ કર્યું છે કે ૯૩% બુકિંગ ઓનલાઇન થઈ રહ્યા છે, તેથી લોકોએ રૂબરૂ જવાનું ટાળવું જોઈએ. e-KYC અંગે ચાલી રહેલી અફવાઓ પર મંત્રાલયે કહ્યું કે આ કોઈ નવો નિયમ નથી, માત્ર છેતરપિંડી રોકવા માટેની ચકાસણી પ્રક્રિયા છે. નોંધનીય છે કે ભારત તેના LPG વપરાશનો ૬૦% થી વધુ ભાગ આયાત કરે છે, જેમાં હોર્મુઝની ખાડીનો માર્ગ અત્યંત મહત્વનો છે.

LPG બુકિંગના નવા લોક-ઇન પિરિયડ:

• શહેરોમાં: હવે ૨૫ દિવસના અંતરે જ નવું બુકિંગ કરી શકાશે.
• ગ્રામીણ વિસ્તારોમાં: બુકિંગ વચ્ચેનો ગેપ વધારીને ૪૫ દિવસ કરવામાં આવ્યો છે.
• ઘરેલુ સામાન્ય બુકિંગ: લોક-ઇન પિરિયડ ૨૧ દિવસનો રહેશે.

સરકારે ખાતરી આપી છે કે દેશમાં હાલમાં થોડા અઠવાડિયા ચાલે તેટલો તેલ અને ગેસનો ભંડાર સુરક્ષિત છે, તેથી ગભરાવાની કે સંગ્રહખોરી કરવાની જરૂર નથી.