ભોપાલ :   મધ્યપ્રદેશની રાજધાની ભોપાલમાં હાઈ-ટેક પરિવહનના સપના સાથે શરૂ થયેલી મેટ્રો ટ્રેન અત્યારે સફેદ હાથી સાબિત થઈ રહી છે. 21 ડિસેમ્બર, 2025ના રોજ મોટા ઉપાડે શરૂ થયેલી આ સેવાને હજુ માંડ ત્રણ મહિના થયા છે, ત્યાં જ પ્રવાસીઓનો દુકાળ જોવા મળી રહ્યો છે. સુભાષ નગરથી AIIMS સુધીના 7 કિલોમીટરના ટ્રાયલ રન જેવા રૂટ પર દોડતી આ ત્રણ કોચની ટ્રેનમાં મોટાભાગની સીટો ખાલી રહે છે. ચોંકાવનારી વાત એ છે કે સાંજના વ્યસ્ત સમયે પણ ટ્રેનના છેલ્લા કોચમાં એક પણ મુસાફર જોવા મળતો નથી, જે પ્રોજેક્ટની ઉપયોગિતા પર મોટા પ્રશ્નાર્થ ચિહ્નો ઉભા કરે છે.

લોકલ18ના રિયાલિટી ચેકમાં ભોપાલ મેટ્રોની પોલ ખુલી પડી ગઈ છે. જ્યારે એક રિપોર્ટરે 40 કિમી પ્રતિ કલાકની સામાન્ય ઝડપે બાઇક ચલાવી મેટ્રો સાથે રેસ લગાવી, ત્યારે આધુનિક ગણાતી મેટ્રો ટ્રેન બાઇક સામે હારી ગઈ હતી. રસ્તામાં બે જગ્યાએ થોભવા છતાં બાઇક સવાર મેટ્રો સ્ટેશન પર ટ્રેન પહેલા પહોંચી ગયો હતો. મેટ્રોની આ 'ગોકળગાય' ગતિ પાછળનું મુખ્ય કારણ ટેકનિકલ મર્યાદાઓ અને ટૂંકો રૂટ માનવામાં આવે છે. લોકોનું કહેવું છે કે જો મેટ્રો પોતાની નિર્ધારિત ગતિએ ન ચાલે અને સમય ન બચાવે, તો મોંઘી ટિકિટ ખર્ચીને તેમાં મુસાફરી કરવાનો કોઈ અર્થ રહેતો નથી.

નિષ્ણાતોના મતે, ભોપાલ મેટ્રો અત્યારે માત્ર એક 'શો-પીસ' બનીને રહી ગઈ છે. 16 કિલોમીટરની ઓરેન્જ લાઇનમાંથી માત્ર 7 કિલોમીટરનો પટ્ટો કાર્યરત હોવાથી તે સામાન્ય નોકરિયાત વર્ગ કે વિદ્યાર્થીઓ માટે બહુ ઉપયોગી સાબિત થઈ રહી નથી. જ્યાં સુધી આખી લાઇન કાર્યરત ન થાય અને ટ્રેનની સ્પીડ વધારવામાં ન આવે, ત્યાં સુધી મુસાફરોની સંખ્યા વધવાની શક્યતા ઓછી છે. હાલની પરિસ્થિતિ જોતા એવું લાગે છે કે ભોપાલવાસીઓ માટે મેટ્રો ગર્વનો વિષય ઓછી અને માથાનો દુખાવો વધુ બની રહી છે, કારણ કે કરોડોનું રોકાણ અત્યારે પાટા પર ધૂળ ખાઈ રહ્યું છે.