વોશિંગ્ટન:પશ્ચિમ એશિયામાં ચાલી રહેલા તણાવ અને યુદ્ધની સ્થિતિ વચ્ચે વૈશ્વિક અર્થતંત્ર માટે એક અત્યંત મહત્વના સમાચાર સામે આવ્યા છે. અમેરિકાએ સંકેત આપ્યો છે કે તે ઈરાની તેલ પર લાદવામાં આવેલા કડક આર્થિક પ્રતિબંધોમાં ઢીલ આપી શકે છે અથવા તેને સંપૂર્ણપણે હટાવી શકે છે. યુએસ ટ્રેઝરી સેક્રેટરીએ આ અંગે સત્તાવાર પુષ્ટિ કરતા જણાવ્યું છે કે, આ પગલાનો મુખ્ય હેતુ આંતરરાષ્ટ્રીય બજારમાં કાચા તેલના ભાવને સ્થિર કરવાનો અને વધતી જતી મોંઘવારી પર કાબૂ મેળવવાનો છે.
છેલ્લા કેટલાક સમયથી ઈઝરાયલ-ઈરાન સંઘર્ષને કારણે કાચા તેલના ભાવમાં જોરદાર ઉછાળો જોવા મળ્યો હતો. જો ઈરાની તેલ પરના પ્રતિબંધો હટી જાય, તો વૈશ્વિક બજારમાં તેલનો પુરવઠો વધશે, જેનાથી ભાવમાં નોંધપાત્ર ઘટાડો થઈ શકે છે. ટ્રેઝરી સેક્રેટરીના મતે, આ વ્યૂહાત્મક નિર્ણયથી માત્ર અમેરિકા જ નહીં, પરંતુ સમગ્ર વિશ્વના ગ્રાહકોને મોંઘા ઈંધણમાંથી મુક્તિ મળી શકે છે.
જો આ નિર્ણય અમલમાં આવે છે, તો ભારત જેવા દેશો માટે તે મોટા આશીર્વાદ સમાન સાબિત થશે. ભારત તેની જરૂરિયાતનું મોટાભાગનું તેલ આયાત કરે છે. અગાઉ ઈરાન ભારતનો મુખ્ય તેલ પુરવઠો પૂરો પાડતો દેશ હતો. પ્રતિબંધો હટવાથી ભારત ફરી એકવાર ઈરાન પાસેથી સસ્તું તેલ ખરીદી શકશે, જેની સીધી અસર ભારતમાં પેટ્રોલ અને ડીઝલના ભાવ પર પડશે અને સામાન્ય જનતાને મોટી રાહત મળશે.
નિષ્ણાતો માને છે કે આ પગલું માત્ર આર્થિક જ નહીં પણ રાજકીય રીતે પણ મહત્વનું છે. અમેરિકા આ તેલના પુરવઠા દ્વારા રશિયા અને અન્ય તેલ ઉત્પાદક દેશોના વર્ચસ્વને ઘટાડવા માંગે છે. જોકે, ઈરાન આ બદલામાં શું શરતો રાખશે અને ઈઝરાયલ આ નિર્ણય પર કેવી પ્રતિક્રિયા આપશે, તેના પર હવે આખી દુનિયાની નજર છે